絲絲講場：馬斯克事業愛情兩失意

Tesla股價睇跌兩成

Tesla股價係咁跌，投行派杰加入唱淡，話下個支持位喺285美元同243美元，即係較周一收市跌7.5至21%。

不過，最令財金界同娛樂圈成地花生嘅係，馬斯克剛喺Twitter度Unfollow拍咗拖幾個月嘅加拿大女歌手Grimes，疑似掟煲。

五月初，馬斯克同Grimes高調孖住出席美國時裝界盛事《大都會藝術學院年度慈善晚宴》（MET Gala），Grimes頸條Choker有個手掌咁大嘅Tesla標誌，係人都知乜事。

本月初馬斯克出Tweet話打算私有化Tesla，市場嘩然，仲搞到畀美國證交會查，Grimes都喺Twitter力撐愛郎。

點知上周，美國女Rapper Azealia Banks喺IG爆，話之前應Grimes邀請去馬斯克屋企度周末，但就講明叫Banks唔好帶男友（點解唔好帶呢可？），點知嗰個禮拜Grimes自己全程掛住冧男友，得番Banks一個喺馬斯克間屋發悶。

Banks仲爆話，馬斯克當日個「私有化」Tweet係喺「唔清醒」狀態下出（點唔清醒法？唔知呢），又踩馬斯克又植髮又食類固醇，直頭係「Beta男」（「次級男」者，即是唔夠Man）。

馬斯克之後否認見過Banks，Tesla就話Banks所講係廢話，Grimes就封嘴。結果，上周日馬斯克就Unfollow咗Grimes。

睇番馬斯克舊年十一月同明星安芭赫德（Amber Heard）分手，話自己心碎到要猛灌紅牛，先撐得住主持個Tesla Model 3推介會，咁今次又點呢？

余絲韻