絲絲講場：百事CEO師承喬布斯　做主腦「咪咁好人!」

被印度人視為國民偶像、美國標普500大企業之中極少數女性人物嘅百事公司（PepsiCo），其史上首位外籍女行政總裁努伊（Indra Nooyi）將於今年十月三日卸任，之後於一九年卸任董事長，正式結束百事生涯。

努伊現年62歲，喺美國頂級學府耶魯大學畢業，九四年加入百事擔任企業策略主管，○六年底接任行政總裁，不知不覺掌管咗12年，期間百事股價累漲80%，收入更跑贏對手可口可樂。

佢點評論何謂「好主管」？原來同已故Apple前主席、被譽為改變世界嘅教主喬布斯有關！努伊憶述，○六年時有機會同喬布斯交談近3個鐘，更從中獲得3個成功法則。

要懂得發脾氣

喬布斯話：「唔好咁好人（Don't Be Too Nice）。若你心中所想唔能夠實現，而又覺得做法其實對公司有利，即管發脾氣，甚至反枱，因為人哋會談論，全世界會知件事對你如何重要。」喬布斯正正有呢一種態度，若有產品設計唔啱心水，會將草圖掟落地，然後命令員工徹夜修正。

堅持自己信念

喬布斯話：「如果你對自己嘅想法深信不疑，就要一直堅持，完全無視反對者嘅看法，因為全世界都會想改變你。」

留低個人特色

喬布斯話：「舉例若設計對你嚟講係重要，就一定要直接親手主責搞好佢，因要將新嘢帶入公司。如果唔能夠畀佢哋知CEO要做好呢樣嘢，寧願一開始唔好搞！」

余絲韻