絲絲講場：新股「多鑼鑼」百濟小公主搶Like

巨無霸新股中國鐵塔公司（00788）同首間來港「雙重上市」嘅百濟神州（06160）尋日齊齊掛牌。港交所將之前曾經亮相嘅特大鑼擺出嚟助興，兩旁仲各有一隻平日用嘅傳統鑼傍住，不過鐵塔公司董事長佟吉祿同百濟董事長歐雷強（John Oyler）都係各自敲番隻傳統嘅鑼，尋日焦點認真「多鑼鑼」！

百濟嘅歐總帶埋屋企人嚟見證呢個重要時刻，仲不時抱住佢個囡囡，呢位中美混血嘅小公主風頭一啲都唔輸蝕！

小公主名牌上寫住中文名「來安」，歐太話唔係因為佢姓「來」，純粹寓意「既來之，則安之」。小來安不時攬住爸爸，但一路神態自若，果然一派大家風範！

至於鐵塔公司，在場人士嘅焦點似乎相對凝重，事關佢哋早前被指臨上市畀人入稟要求拆除涉嫌侵犯佢專利嘅產品，兼索償1,000萬人仔。佟總都好大方應對，話鐵塔公司非常尊重知識產權，但同時會依法保護自身合法權益；至於涉嫌侵權產品應用範圍有幾大，暫時仲查緊。

佢大派定心丸釋除市場覺得公司太依賴內地三大電訊商嘅疑慮，又話希望出年實現期權激勵計劃，激發公司內部活力。

好嘞，大鑼加持下嘅兩隻新股首日掛牌嘅表現又點呢？鐵塔公司收報1.26元，同招股價一樣；百濟神州就收報107元，較招股價低0.92%。

余絲韻