絲絲講場：近億殭屍戶口玩謝Ig？
研究公司Ghost Data爆料話，原來全球最大嘅圖片分享社交媒體平台Instagram（Ig）可能有多達9,500萬個俗稱「殭屍戶口」嘅機械人偽裝戶口，佔目前10億總戶口數目嘅9.5%。
為咗進行呢項研究，Ghost Data買咗兩萬個殭屍戶口嚟分析佢哋嘅行為，之後先總結上述結論。Ghost將呢啲殭屍戶口嘅行為同大約100萬個戶口進行比對，發現佢哋十分活躍地關注Ig裏面嘅流行戶口。至於佢哋發布嘅內容通常都係用其他網站上嘅模特兒照片。
Ghost Data創始人斯托羅帕就話，隨着社交網絡開始打擊殭屍戶口，佢哋嘅製造者變得更聰明，以前佢哋專注嘅戶口數同自己嘅粉絲數係40：1，如今將比例降至5：1，令搵佢哋嘅難度大大提高。
Fb明年添兵抗機械人AC
不過，各大社交媒體平台亦開始作出強烈抵抗。Ig母公司Facebook（Fb）話，佢哋有1萬人從事安全同內容方面工作，包括掃描機械人同惡意行為。Fb並計劃喺明年將相關人員嘅數量增加一倍，同時利用配對學習技術去識別殭屍戶口。
本月初Twitter被曝光過去兩個月封閉約7,000萬個疑似殭屍戶口，累計刪咗逾億個添。奈何此舉令Twitter股價大跌，搞到被譏諷成「究竟係自救定自殺」！
余絲韻