絲絲講場：史上最有錢貝索斯身家萬二億

今年嘅Prime Day喺美國東岸時間周一（十六日）下午三點開始咗，直到周三（十八日）凌晨三點結束，呢36小時內登記會員可以秒殺減價貨。

亞馬遜股價創新高帶挈

亞馬遜股價破頂，帶挈埋舵手貝索斯身家爆升，首次突破1,500億美元（約1.17萬億港元），進一步拋離微軟創辦人蓋茨嘅950億美元，更威水係貝索斯身家仲破埋蓋茨喺九九年經通脹調整後創下嘅1,490億美元紀錄，成為近代最有錢富豪。

貝索斯雖然只係揸住亞馬遜約16%股份，但亞馬遜業務版圖愈嚟愈大，除咗雲端服務領先其他科企，亦開發一系列Alexa智能產品，而核心零售業務就進軍埋藥房、超市，難怪公司股價今年到依家就已經大升咗55%，貝索斯身家短短七個月就漲咗超過500億美元（3,900億港元）。

依家亞馬遜市值達8,843億美元直逼蘋果公司（Apple Inc.），公司今個月廿六日派上季成績表，如果表現對辦，到時好大機會成為史上首家市值破萬億美元嘅上市公司，到時又要同貝索斯計身家了。

Prime Day故障無礙銷售

講番今次為時36粒鐘嘅Prime Day，亞馬遜可謂出師不利，無論網上抑或App開始嗰陣都出現咗故障，唔少想掃平貨嘅消費者喺社交媒體留下#PrimeDayFail嘅hashtag鬧爆，一度令市場擔心會影響銷售成績。雖然亞馬遜仲未公布銷售數字，不過有調查機構估計，故障只係影響頭一個鐘，令銷售減少咗5%，但其實頭三個鐘累積銷售仲比上年同期多出54%！

今次谷起貝索斯成近代宇宙最富，你會唔會都有份？

余絲韻