Market Insight：業績報佳音撐水泥股

要知道，古勝一直都講熊市初現時的反彈，正正是最後逃生門或轉倉保本的良機，若看官自問去年或者今年初期間都要輸錢，在如今風高浪急之際，更應好好擁抱現金，因為現時絕非入場之時！

表面上，中美貿易戰對投資市場的負面影響似已大致反映，但要留意事件往後發展仲係有變數。觀乎過去發生類似事件後，環球金融市場多數冇運行，故相信港股每次的反彈，都只不過是熊市中的起伏而已。

大媽好快可買「米」

昨日恒指跑輸國指，主因幾隻權重股表現都唔多好，例如騰訊（00700）跌2.3%，友邦保險（01299）跌0.8%，石藥集團（01093）更跌3%，至於瑞聲科技（02018）及舜宇光學（02382）則跌1%及2%。

市場雖憧憬騰訊有機會在下月中旬公布中績前炒一轉，但近期負面因素不少，如近期氣氛偏淡、中美貿戰打壓內地科技發展、北水持續沽貨等，加上瑞信剛出報告，預期騰訊次季盈利差過預期，將其目標價降至496元。凡此種種皆令股價受壓，昨日先高後低，睇勢短線博唔過。

至於小米（01810）果然同股不同「權」，上市翌日已獲納入恒指綜合指數，大媽好快就可透過港股通買「米」。照咁睇，就算係被動型指數基金點都要入番啲貨，難怪股價可抽升13%。有大行即刻出報告唱好，將目標價高調地放在天空咁高的30元。姑勿論幾時先至升到，但小米短期再挾的機會確唔細，有閒錢的不妨小注短炒一轉，但要留意一跌穿16元就要止蝕。

海螺或挑戰50元關

水泥板塊昨日靜極思動，主因海螺水泥（00914）發盈喜，預期中期純利按年增長80%至1倍，除帶動股價升3%收市外，亦令板塊氣氛回暖。若以海螺去年上半年純利為67.17億元人仔計，今年的中期盈利將達120億至134億元人仔。業績表現靚仔，是由於產品銷售價格升幅較大，意味着其他水泥股業績亦應該見得人，唔怪之得華潤水泥（01313）、中國建材（03323）、西部水泥（02233）同亞洲水泥（00743）齊齊做好。

策略上，海螺勝在規模夠大，股價早前在40元邊止跌後級級上，若在成交配合下衝破45元阻力，進一步並挑戰52周高位50.45元機會唔細，可以10天線43.2元水平作止蝕位。

古勝