自問唔熟內地股市，所以要睇通告同市場消息，但有時都睇到絲絲一頭霧水。
話說有隻做開養豬及肉類加工嘅深圳A股羅牛山（000735.SZ）（冇錯，公司名雖然有「牛」字，但其實係養豬嘅），今年五月忽然話投資287億人仔喺海南搞「賽馬娛樂文化小鎮」。
個賽馬鎮十劃未有一撇時，上周三公司發出《關於董事長向全體在職員工發出增持公司股份倡議書的完成公告》，到上周五再出公告話董事長徐自力自己減持股權4.5%！咁即係點？
市場即時議論紛紛，唔會係鼓勵人家增持就自己掟貨吓嘛？若以為係咁就中伏了。睇真啲，徐董叫員工買股係舊年六月嘅事，徐董當時仲承諾若股價一年後跌咗，佢自己扲荷包為員工包底，蝕幾多賠幾多。
絲絲再睇真啲，舊年六月呼籲員工增持時，羅牛山股價正喺六蚊人仔水平低位，到今年五月初搞賽馬鎮消息一出，股價就由九蚊水平爆上，同月底飛升到十七蚊樓上創埋新高！
二千幾個羅牛山員工中，當日有六位好响應掃貨，仲好爭氣，喺今年六月股價高位時甩晒所有貨，唔使老闆出手包底。公司上周三個公告其實主要係講徐董唔使包底啫。
余絲韻