絲絲講場：財金龍虎會465架私人飛機塞爆

事關投資大行Allen & Co.喺當地開嘅金融年會，當地時間周二開鑼，現今最有權有勢嘅科技、金融及媒體巨頭齊集，一時間多至465架私人飛機飛到，莫講話航空交通混亂，仲要只得約100個機位，今次仲唔世界大亂？

貝索斯庫克傳出席

呢場一年一度嘅龍虎會，唔係以為自己夠出名、夠有錢就去得，要人家畀面邀請先得。今年應邀出席嘅，聽講包括亞馬遜創辦人貝索斯、Apple教主庫克、Facebook舵手朱克伯格、通用汽車主席巴拉等。

呢啲科企巨子嘅行頭，個個都咁上下，老牛加件Tee或Hoodie，就算踩住對成萬蚊嘅波鞋，都未必一眼望到知幾堅。所以呢，咁嘅場合，無架私人飛機出嚟晒吓又點得呢？呢個身份象徵，先夠畀人望得清清楚楚。

無私人飛機傍身嘅點算？放心，可以租。當地租機公司話，飛去嘅Booking比舊年多咗三成，飛走嘅多咗六成，仲未計呢幾日有人臨急先Book嗰啲，所以預咗今年會大混亂。

股神嫌嘥錢 自己揸車去

所以，雖則個會議係唔公開嘅，但當地居民一見到啲私人機一架二架喺機場Double-parked，就知又開會嘞。

不過，有位超級富豪係唔會跟風，即使佢自己有私人飛機兼飛機公司，而佢就係股神巴菲特。佢不時批評大企業為高層配置私人飛機好浪費，所以佢幾乎年年係自己揸車去開會。有堅持，抵佢係「神」級！

余絲韻