絲絲講場：會計師有幾好Pay？

根據香港會計師公會最新發表嘅一七年調查結果，受訪者年齡雖較公會整體會員年輕、年資較淺，但平均年薪都有81.7萬元，計落月入6.8萬元！就算係讀緊QP（公會專業資格課程）第三年嘅學生，平均年薪亦有28.3萬元，除開月入成2.35萬元！

今年會計師薪金加幅高於通脹，自然唔使講，就連花紅增幅亦上升。舊年嘅受訪者有84%人加薪，今年比例增至87%，而獲發花紅嘅人由舊年嘅79%增至80%！

做會計師，大致可分為喺事務所做或受聘於企業，兩者薪酬架構差別好大。至於邊度做賺多啲？調查顯示，喺事務所做，加薪幅度好啲；喺商企任職，薪金增幅相對低，不過花紅較厚喎！

生科企業上市勢帶動需求

估唔到會計呢行，人才流動性原來都好高吓。調查發現，前年有25%受訪者曾轉職，近三成人甚至轉到新領域發展，當中三分之一由傳統嘅會計工作，轉至非傳統會計職能，包括顧問、諮詢、法律、投資及財務、資訊科技或培訓與發展。仲有四成人打算呢一年會轉工添。

就係咁，搞到四大會計師事務所嘅中高層管理好頭痕，有83%呻請人難，96%就話留人難。

公會專業資格及教育執行總監伍大成仲話，嚟緊有更多同股不同權公司與生物科技公司嚟香港上市，預期會進一步刺激起對會計師嘅需求添！喂前景一片明朗，不妨諗諗。

余絲韻