特製巨鑼賀小米？
小米集團（01810）昨日上市，場面大陣仗！連敲嗰個鑼都大過人。巨鑼肯定係特登訂造，不過就唔係為咗小米囉。香港交易所（00388）解釋，巨鑼原為今年初港交所翻新後開幕時用的，可惜送唔切貨，所以金融大會堂開幕時巨鑼無影；小米作為新上市機制下的首隻上市股份，都算係歷史性時刻，所以就搬出嚟用。
「米兔騎牛牛」撐唔起
港交所仲透露，巨鑼直徑達1.8米，連埋個架，高近3米，寬3米，有成200公斤重！
小米有得敲巨鑼，同場掛牌的紫元元（08223）卻被安排於金融大會堂的外圍敲鑼，與在大堂內的小米分隔開。
雷軍家人低調捧場
唔止有巨鑼，小米仲自製「米兔騎牛牛」雕像畀港交所作為紀念品，不過隻牛對其股價無咩幫助啦，完全撐唔起股價。
昨日喺上市儀式仲見到創辦人雷軍家屬變身「矇面俠」，低調撐場。