孖妹S檔案：撈底唔淆底掌握3大竅門
撈底唔淆底，淆底唔撈底？中美貿易戰上個禮拜五開打，陸上亂槍子彈橫飛，孖妹驚閃避不及送命，就孭住氧氣樽潛入水底，靜心諗吓金融市場有乜可以撈。點知畀我哋遇上幾個金融界猛人，大家一齊潛深啲，睇透啲！
Mike：宏高證券投資經理 梁杰文（Mike）
梁：投資策略顧問 梁健雄
盧：ASC分析系統創辦人 盧駿匡
蔡：香港程式交易研究中心總裁 蔡嘉民
Kitty：大笨象，揸支槍，去打仗……
彩兒：一支槍傍身，唔夠安全。投資忌盲人摸象，否則損手收場。
盧：跌市撈底確有風險。如果你驚，就等升先入市。
Mike：謹記撈貨唔好瞓身，宜用約一成資本，短炒博反彈。
睇位 利用技術分析捉路
Kitty：呢個畸形市，用咩指標捉路最啱？
盧：睇250天移動平均線，若恒指見底，而個別成分股率先企穩250天線樓上，表示其股價走勢強過恒指，就更值得撈。我估依家未到熊市，預期恒指26,000點見底，其後港股會反彈，屆時恒指成分股會升得最快。
Kitty：我等唔切，想即刻入市。
彩兒：睇嚟你好想交學費啵。
盧：依家係牛市大型調整，即恒指會跌穿250天移動平均線並維持一個月左右，預計仲有半個月先見底。查實跌穿後，再向下空間有限，所以急住入，就睇成分股超賣水平喇。
用Beta值搵超賣股份
蔡：目前係淡市，市場上有唔少跌超過10%嘅股份。不妨運用Beta值，其預測股票對比指數嘅下跌或上升幅度，可以搵超賣股份。如果下跌幅度超過Beta值預測，就係超賣。例如中國神華（01088）Beta值1.33，當大市下跌1.4%，理論上佢只應該下跌1.86%，但上周二下跌2.9%，所以可考慮撈底。
Kitty：聽聞當相對強弱指數（RSI）數值少於30，即代表超賣，短期內大機會回升，到時可考慮買入資產。
Mike：啱。例如恒指RSI於14天內跌穿30，更連跌幾日，即確認超賣，可博反彈。撈貨首選大價股，因中小型股份一般反彈滯後。
分段式入市減風險
盧：我建議趁成分股出現超賣，股價創新低，但RSI並非創新低，卻有回升迹象時，分三注買入。第一注宜小注，小試牛刀；待股價插一成，買入第二注，注碼可加大；再等股價插多一成，用剩低想投資此股票嘅錢作最後一擊。
Kitty：呢個分段方法有咩好？
盧：分段式可控制注碼，拉低平均價，又可以攤長時間捕捉反彈浪，一舉三得，例如工商銀行（01398），建議分注喺5.1元及4.5元吸納。
彩兒：如果係跌市，投資者會唔會無心機炒股，入市意欲低？
梁：臨近暑假，有Holiday Mood，要集中投資，確實有難度。
買方成交增 有力上
蔡：所以睇成交量好重要。若大市嘅陰陽燭形態出現錘頭，都要分注撈。錘頭指當日股價大瀉，但沽盤未能持續，買盤反彈。若當日成交量異常大，如過去20日平均成交量高近一倍，證明買方力量充足，有資金入市撈底。如神華上周成交額曾逾8億元，而平時只有不足5億元。另碧桂園（02007）成交額曾觸及17.4億元，連續五日有多近一倍成交額，過去20日平均成交僅10億元。
彩兒：目前基金嘅入市意欲又點？
梁：聽聞有投資基金大戶對呢個市失去信心而抽走資金。相信唔少基金規模都細咗，唔排除會出現贖回潮。
Kitty：再撩起入市意欲，可能剩番平價股。AH股有溢價嘅，有無得諗？
蔡：可以！過去一個月，廣發証券（01776）AH溢價擴大，其A股六月十九日開始見底反彈，但H股繼續跌，H股理論上同A股差距唔可以太大。
睇市盈率評估趨勢
Kitty：市盈率跌到幾多先叫筍？
梁：好友會話，恒指上周三市盈率曾跌至近11倍，而過去13年恒指市盈率4次跌穿雙位數，每次跌穿後不久，恒指會轉勢向上。所以，佢哋會覺得中美貿易爭端加劇，市盈率見單位數，都只會維持短時間。
睇勢 基金清倉 暗示跌完
盧：我唔悲觀呀！目前並非熊市。港股一月都唔見好亢奮，所以尚未出現牛市尾段，依家只係牛市大型調整。
Mike：要搵最後一跌，就要睇實基金幾時清倉，大戶唔問價沽貨，仲有公用股跌超過一成。如果符合以上條件，預示港股可能跌完，係建立長倉好時機。
美匯倘再強 累港股
Kitty：最弊嘅係跌市原因多數係估唔到。
蔡：盡量搵啦。例如上個禮拜初嘅跌市，應該同人民幣貶值有關，唔少內房已發行海外美元計價嘅債券，而人民幣貶值增加償還壓力，違約風險上升，市場出現恐慌，內房遭拋售，華潤置地（01109）及碧桂園都被拖累。
Kitty：市場氣氛唔好，點會唔心慌慌。
梁：我覺得唔撈底最好！因為我擔心美匯指數已喺94至95高位徘徊，如果聯儲局九月加息，美匯再向上，更多資金流入美市，以致港股走資加劇。
另即月期指跌穿28,000點，且傳統基金愛股申洲國際（02313）股價開始跌穿50天線及保力加通道，表示基金經理避險情緒高漲。過去多數恒指一月見頂回落，要跌到九月先停；恒指RSI亦跌到30，一時三刻難轉勢。
Kitty：「美中」不足嘅又係咩？中美貿易係咪有排玩？
梁：依家係政治市，港股正被陰乾。中美喺貿戰嘅敵對立場強硬，美國勢要設法壓抑中國發展高科技，以及「中國製造2025」計劃。
Kitty：我要搵逃生門！
睇股 強多過弱 趁機入市
Kitty：嚟個強勢股與弱勢股對決！
盧：我會將強勢股定義為短期已形成向上趨勢嘅股份，而當市場上強勢股數目比弱勢股多，就代表市況良好，係入市時機。至於目前市況剛剛相反，喺牛市大調整期，若投資者入市，即逆市而行，投資風險明顯增加。
彩兒：見到咩股要掉頭走？
盧：細價股！因市況好時，莊家只要用少少力就要風得風，要雨得雨。但依家市場氣氛差，莊家都少咗動作。
梁：至於認購新股與否，就睇供求及集資額，若集資額少兼超購多，其股價上市爆炸力強，隨時做到逆市奇葩。
Kitty：如果非入市不可呢？
梁：趁中國谷內需及中美貿易戰，中國反擊對進口美國體育用品加徵關稅時，會惠及內地體育股，令其銷量增加。我睇好安踏體育（02020）、特步國際（01368）及李寧（02331）等。
盧：期待港股反彈，當然買恒指成分股，我估內銀及內險股會貼市率先彈。
梁：此外，內房及內銀股最近跌得幾傷，估值都幾吸引。至於個別股份，投資者可嚴選派息5厘以上，兼國家隊入市維穩時首選嘅股份，包括交通銀行（03328）、工商銀行、農業銀行（01288）、滙豐控股（00005）及港華燃氣（01083）。
中電港燈領展值博
Kitty：防守力較強嘅公用股呢？
Mike：中電控股（00002）、港燈（02638）及領展房產基金（00823）等可以考慮買入。最近中電股價一度創新高，就算上個禮拜二恒指曾大跌超過900點，中電仍於高位徘徊。
彩兒：美國係撩交打嘅一方，佢嘅籌碼比中國多，美股係咪會好啲？
梁：無疑美國有條件加息，而且經濟確認復甦，投資者可以考慮買美國標普500指數基金。
但「人」棄我取都不失為上策！人行多位官員上周出口術，指美元兌人民幣難跌穿6.9。我信投資者可以趁人民幣跌到6.7至6.8水平，買入12個月人民幣定存，息率幾吸引。
若有料報畀彩兒同Kitty或有嘢問，可電郵money.biz@on.cc
Kitty 彩兒