Market Insight：內需板塊大行仍睇好

市傳當日午後有國家隊入場救市，但觀乎過去國家隊入場初段，通常都以中資金融股如內銀及內險作先鋒，但係睇兩大板塊的表現，似乎好難令人信服。正如古勝早前講過，查實國家隊唔出場仲好，因為按過往經驗，出手後最終都唔會有好下場；相反，如果港股急插成千點，或者可能吸引到部分博反彈資金入市撈底，可惜事與願違。

中國牌面較蝕章

美國總統「侵侵」上周話過，除首階段的340億美元中國商品徵收關稅外，未來兩周內追加160億美元，之後還可以加徵2,000億美元關稅，甚至進一步向3,000億美元貨品徵稅。簡單計一計，上面講緊係合共5,500億美元！即使中國第一時間反擊，話反制措施即時生效，正式向美國部分進口商品加徵關稅。但講真，中國係外向型經濟，一旦發生貿易戰，對中美雙方的傷害如何，其實顯而易見。

股市氣氛唔就，資金自然主力避險，近日見一眾防守股就算唔升，但都跌得無咁甘！除早前提及穩定派息的公用股如中電控股（00002）、港燈（02638）、電能實業（00006）及部分房產信託基金（REITs）如領展、置富產業信託（00778）外，上周見部分內需食品股及農業相關股都有異動。

食品股能逆市做好，主要係有大行睇好未來即食麵前景，而統一企業（00220）及康師傅控股（00322）公布的業績表現不俗，前者去年賺8.78億元人仔，按年勁升44%，加上今年首季業績保持強勁，稅後利潤按年升約47%；後者過去數年盈利下滑，惟去年業績成功大翻身，全年盈利按年升56%，今年首季更多賺64%。

當然，從估值分析，統一及康師傅往績市盈率已分別達38倍及43倍，唔算太便宜，但既然市場難搵食，資金揀無可揀下，短線食吓「即食麵」先都唔出奇。

農業股未宜憧憬

至於農業相關股份，以往都經常成為資金在大跌市中博反彈的板塊。國家領導人上周提出鄉村振興戰略，第一拖拉機A股（601038.SH）借勢升停板，至於H股（00038）則一度高見2.67元，不過尾市升幅收窄，最終升3.6%報2.58元；至於隻中化化肥（00297）最後就無升跌。

事實上，農業股近年都唔係港股投資者杯茶，加上兩間公司近年業績麻麻，前者去年少賺74%，後者去年虧損22億元人仔，從牌面睇，已好難吸引資金衝入去，都係望吓就算。

古勝