絲絲講場：銀行六大新工你估做乜？

絲絲見到啲職位名都嚇一跳，好似「混合實境體驗設計師」及「演算工程技師」咁，原來全部同金融科技有關。前者係用近年好流行嘅虛擬實境技術，去設計銀行用戶系統介面；而後者就係透過分析業務數據，調整公司策略。

滙豐招聘過千數碼專才

至於「對話界面設計師」係專注改聊天機械人（Chatbot）嘅語音及文字。而「數碼處理工程師」主要係分析、整合並完善客戶由開戶到補領失卡等來自不同渠道資訊嘅工序流程。

近年愈來愈多銀行同金融科技公司合作，於是要請「合作夥伴把關人員」，去監管資金及客戶資料流通合乎規格。而現有嘅客戶顧問，除識得解答客戶問題，未來仲需要處理虛擬環境職務，就可以成為「綜合服務顧問」。

滙豐零售銀行及財富管理業務全球創新與合作總監鄺禮安話，人工智能並唔會取代人類智慧，只有透過糅合先進科技及人類獨有優勢，先可以提升客戶體驗。

滙豐依家亦需招聘過千名數碼人才，包括UI設計師（即是用戶介面設計師，好多時唔止設計網頁，仲要搞埋App）等，當中超過500個職位係喺亞太區。

余絲韻