Market Insight：大市跌勢逐步擴散

不過，睇番內地股市就唔係太樂觀，滬綜指昨日跌1%至2,759點，投資者憧憬阿爺出手救市始終未見蹤影。古勝認為，按A股過去大跌市經驗，阿爺出手隨時「好心做壞事」，股市反而有機會愈跌愈深。

人仔續貶 加劇走資

查實今次A跌調整，主因是人民幣貶值及中美貿易摩擦引起，但要留意的是，人民銀行若有意以減息或讓人民幣貶值來對抗貿易戰，其實理論上是不太可行，主因有兩個：首先，近期資金由人仔流向美元的趨勢明顯，若人行宣布減息，恐怕走資速度會更快更狠，屆時如內房等外債較重的企業隨時爆煲，內地債市亦會被波及。

其次係，中美打緊貿易戰，中國本來想靠內需去穩經濟，但人仔貶值將進一步減弱民眾購買力，內需引擎隨時又死火。所以話，內地股市自年初反覆下跌至今，但都未見阿爺出手，確有一定的原因。

正如在下早前提及，航空股同內房股係今轉最受人仔貶值及強美元影響的板塊，中短線都唔使諗。話口未完，內房股近期開始有更深層次的負面消息出現，好似有內媒指碧桂園（02007）正在改變擴張策略，內部已叫停「全覆蓋」戰略，試圖犧牲規模甚至利潤，以保證現金流；另日前有指綠城中國（03900）向員工發出「六大指令」，以全面加速資金回籠。

一葉知秋，雖然市場當刻未必充分了解到上述事件的影響，但港股市底咁弱，資金見有乜風吹草動都一定先走為敬，碧桂園昨日就跌5.7%，綠城中國則跌4.8%，世茂房地產（00813）跌7%，較大隻的中國海外（00688）都要跌1.9%，果然「分手要狠」。

嚴格執行既定策略

另外，港股「熊市動能」除在指數權重股反映外，亦開始擴散至一些早前較強勢的板塊，如醫藥股及晶片股。其中板塊龍頭的石藥集團（01093）昨日就跌足8.2%，而早前係威係勢的華虹半導體（01347）亦要跌7.3%。無他，早前時勢造英雄，但如今英雄亦無用武之地，加上估值已經唔平，要「骨水」自然搵佢哋做目標。

至於昨日最醒神係中電控股（00002）同港燈（02638），事關行政會議批准兩電加價，適逢港股今期無乜好消息，佢哋當然成為資金首選。不過，要留意港股已有熊味，資金走入防守力較強的公用股及高息股避一避合情合理，但若然港股後市由急跌逐漸變成陰陰跌，相信屆時連防守力最強的股份亦難以獨善其身，故如何在事前訂好目標價，又如何在不似預期時嚴格執行止蝕，就是今轉股市贏輸家最大的分別！

古勝