Market Insight：晶片股值得多關注

要留意係，調整市無話唔彈得，只不過彈得少時跌得甘而已！就好似牛市期間都有調整，不過升多跌少，大漲小回。不過，古勝最驚係，後市如果陰陰落，屆時可能輸得仲慘，事關個個睇見咁不但止唔捨得做止蝕，更甚是或會加注溝貨，結果愈溝愈淡，再難翻身。

環球啟動避險模式

睇番美國十年期國債孳息率落番2.89厘，但美匯指數就維持在94樓上的的偏高水平。正如早前所講，市場追捧美元資產，雖與美國加快加息以及中美貿易戰下投資者押注美國有關，但重點係其他高風險資產如高息貨幣、新興市場股市以至當地貨幣皆累積不少跌幅，可見環球投資市場似乎已進入全面避險（Risk off）模式，這對股市後向帶來啟示。

板塊方面，要數較為強勢的相信非晶片股莫屬。華虹半導體（01347）唔經唔覺升到30元邊，而龍頭股中芯國際（00981）昨日升2.7%，先進半導體（03355）升4.8%。

咁又難怪，外媒報道指華府擬限制中資持股比例達25%以上的企業收購涉及「重大工業技術」的美國公司，以及禁止向中國輸出技術，似乎美國總統「侵侵」今次擺明要打高科技產業戰，阻止中國提升國力！再加上美國財長日前又指投資限制將適用於「所有嘗試竊取美國技術的國家」，似乎今次唔係講玩。如果唔係周一晚道指都唔使跌成三舊幾。

正因為咁，市場續憧憬中央將加大力度扶持半導體行業，睇落這個板塊隨時成為港股吹淡風下的逆市奇葩，值得長期關注。

鐵塔出場 睇好中移

市傳中國鐵塔計劃集資80億至100億美元，並尋求本周可獲上市審批，但昨日所見，中國移動（00941）及中電信（00728）分別升1.2%及1.6%，中國聯通（00762）則跌0.6%。

由於中資電訊股主業在內地，相對上，受近期困擾市場的兩大因素，即貿易糾紛與人仔貶值的影響有限，再考慮到市場已消化內地將取消流量漫遊費之負面因素，故短期股價再彈機會不少。三者中，基於中移將成為中國鐵塔第一大股東，加上現價往績市盈率僅10倍，相較中電信的12倍吸引，若中移後市能在成交配合下企穩70元，值得小注跟進，目標價75元，止蝕68.3元。

古勝