絲絲講場：江西銀行望股價似龍飛
江西省唯一省級城商行嘅江西銀行（01916）尋日掛牌，送咗仿元代霽藍釉白龍紋梅瓶畀聯交所作紀念品。
據絲絲了解，霽藍釉係元青花瓷器嘅代表，亦係現今景德鎮陶瓷四大傳統工藝之一。瓷器似乎大有來頭，由景德鎮工匠全手工製作，瓶身一條白巨龍騰空飛舞，遨遊於天地之間，寓意龍騰四海、財源廣進、銀行股價一飛沖天！
江西銀行股價以後點冇人知，淨係知該行首掛開報6.39元，與招股價持平，全日走勢窄幅上落，收報6.41元，較招股價微升0.3%。
該行執行董事兼行長羅焱向投資者大派定心丸，話未來會做好銀行嘅經營管理，將盈利增長速度「把握好一個節奏」，希望不會脫離其他銀行平均水平。
余絲韻