絲絲講場：花旗一姐勸咪入銀行實習
又到一年一度「實習潮」，相信唔少大學生已經搵到心儀嘅公司當實習生（Intern），但花旗銀行香港及澳門區行長伍燕儀（Angel）竟然倒自己米，呼籲商科大學生千祈唔好入銀行實習，到底點解？
原來花旗已經第8年聯同社聯合辦「大學生社責實踐計劃」，為80名本地大學商科學生，分別安排到40間社福機構實習，照顧低收入人士、長者及殘疾人士。Angel講笑咁話，唔好以為花旗作為外資銀行就好離地，其實喺香港扎根過百年，相比好多本地企業「更香港」，更着重社會責任，培育下一代發展未來。
去社福機構先夠貼地
好多人認為有高學歷同豐富工作經驗就搵到好工，但Angel話自己作為銀行家，請人時除咗睇學歷，更睇重佢哋嘅履歷表層面夠唔夠廣闊。佢仲提醒如有心加入銀行界，記得面試時一定要表達自己對社會嘅認知、責任同抱負。
雖然大家都覺得去銀行等嘅大機構實習，見工履歷先夠標青，但佢覺得商科學生去社福機構工作，先可以令佢哋更貼地，同時學識利用商業知識，幫助社會底層人士，呢啲經驗喺金融機構冇辦法體驗到。
余絲韻