中美貿易談判持續，有指中方首肯多買美國農產品，但條件係美國須放棄關稅威脅。事實上，美國總統「侵侵」愛反口覆舌，呢頭話唔同金仔會面，嗰頭又可以當冇講過，美國政府信譽已蕩然無存，只是中國經濟發展始終需要時間，惟今之計只有揸頸就命，換取經濟改革的時間。
到底雙方能否達成協議？古勝偏向樂觀，皆因相信「侵侵」呢個大商家係求財唔係求氣，着數攞得差唔多，自然會收手！
今個星期全球焦點都在「特金會」，和氣收場抑或見面完後就刀光劍影，好快有答案。股民要留意，本周可能是六月市況轉捩點，除了要睇「特金會」成果外，亦要關注美國聯儲局議息。
雖然加息已在預期之內，但未知會對通脹等議題有冇咩新睇法。加上今個月始終係內地企業的水緊月份，新興市場股、匯又頻傳震盪，一旦全球股市掉頭向下，可能會落得好快，上周五恒指大跌554點收場，跌市可能已提早預演，投資者別掉以輕心！
藍籌股中，不少股民視為收息股的中華煤氣（00003），每年現金股息加十送一紅股的派息政策已有多年（上周五剛除淨），長情小股東當然滿意。不過，香港供氣市場已開始飽和，近年煤氣銷售靠工業增加使用燃氣，以及新酒店落成等因素帶動，管理預料未來五年本地燃氣銷量仍有3至5%增長，反而內地燃氣銷量有望維持雙位數字增長。
此外，近年公司積極推動新能源等多元化業務，為可持續發展奠定基礎，難怪股價可長升長有。雖然加息會影響收息股的吸引力，但暫時來看加息步伐還是有序，不用過於憂慮。類似煤氣呢類優質股，若長坐收息，實在唔使太多心自尋煩惱。想買貨的話，去年以來每次回落至250天線（現處13.8元）都是上車機會。
古勝