絲絲講場：工業富聯上市向員工派股票
富士康工業互聯網股份（簡稱工業富聯）今日（八日）會喺上交所掛牌，富士康趁機喺深圳慶祝喺大陸投資30周年。
富士康總裁郭台銘仲錄咗條片。佢話：「我已捐贈個人90%財富，不再為錢財工作，但現在每天還工作16個小時。至於富士康選擇在A股上市是因為大陸員工很難拿到台股股票，工業富聯上市後，會馬上推出員工持股激勵計劃。」
郭台銘憶述貨櫃內辦公
郭總同時發表「走進歷史轉折中的富士康」報告，回顧富士康30年嘅成長。佢提到，喺一九八八年五月嚟到深圳考察，適逢深圳特區歷史轉折，於是富士康走進深圳。九六年富士康開始建設最大嘅龍華工業園區，當初只有一塊荒地，所有磚、鋼筋、地下溝管線，甚至排水溝嘅溝蓋都係富士康自己做。
郭台銘憶述，富士康建廠初期要喺貨櫃辦公。經過30年磨練，富士康已成為全球最大嘅電子產業科技製造服務商。
對於今日掛牌嘅工業富聯，郭總話，喺工業互聯網領域，富士康未來要做中國嘅Predix。所謂Predix，就係GE（美國通用電氣）推出針對成個工業領域嘅基礎性系統平台，可以應用喺工業製造和能源等領域。
余絲韻