孖妹S檔案：好淡對決 轉做花生友？
股市去年大牛市，股友們賺到笑。不過，今年二月美股一度大插，道指曾創一一年八月後最大單日跌幅，自此環球股市升升跌跌，股友們惟有摸着石頭過河，小心翼翼炒股。孖妹想開個股盤，請有錢人落注，賭港股後市究竟牛定熊，買定離手！
黃：晉裕環球投資研究部首席投資策略師 黃耀宗
陳：「荃灣股神」 陳志強
林：資深投資者 林一鳴
蔡：香港程式交易研究中心總監 蔡嘉民
袁：香港大學計量金融與經濟學三年級生 袁志樂
黎：時富金融優越投資部顧問 黎永良
Kitty：咁多專家都嚟落盤，你睇我哋幾受歡迎！
彩兒：身為莊家嘅我哋一於等睇戲啦。
好友：環球利好 港股長線佳
Kitty：環球經濟增長唔錯，中國第一季GDP增長6.8%，美國增長2.3%。國際貨幣基金組織（IMF）提高對全球一八及一九年嘅經濟預測。
黃：環球基本面好，所以港股長線會向好。不過，短線則有保留，因最近市場過分擔心金管局不斷接貨，銀行結餘不斷縮減，遲早會夾港息上。另意大利民粹主義上周曾提出退出歐盟，雖然最終打消念頭，但政局變化令人憂心。
彩兒：你管理嘅基金最近有咩動作？
黃：歐元料貶值，歐企應受惠，有短炒BMO歐優股對沖（03165）。近排中小型股份表現勝大價股，建議買華夏港股通小型股ETF（03157）等。
炒騰訊業績靠期權
Kitty：騰訊控股（00700）上周三出業績，季績靚仔，翌日股價炒上，但港股仍跌。
蔡：我炒過騰訊業績，普遍騰訊業績公布前，期權引伸波幅會升得高，我會做定期權短倉，如勒束式或馬鞍式短倉，等業績公布後引伸波幅回落，就賺到期權金。
彩兒：喺上周騰訊公布業績時有冇賺番筆？
蔡：冇，因今次引伸波幅唔高。
淡友：牛市尾聲 睇多陣再諗
林：依家係牛市尾聲，正值迷茫期，不確定性大，唔知後市升定跌，所以投資都勒住勒住。
Kitty：你曾經講今年係世紀投資衰年，你策略又點？
林：有賺嘅我就食胡，所以一年前買落嘅股份，都沽咗近半，另仍持有滙豐控股（00005）及一啲內銀股，佢哋升跌唔大，可以睇多陣。另外，我仲預留部分資金炒即日期指。我估計，恒指會徘徊於29,000至31,000點。
受累多個負面因素
彩兒：滬股通喺三月及四月有資金淨流出，三月及四月分別有64億元人民幣及274億元人民幣淨流出。深港通喺四月份錄112億元人民幣淨流出。呢個走資趨勢會唔會持續？滬股通及深股通代表外資買A股意欲，意味中港股票吸引力減低。
林：我諗走資情況會繼續，喺五月開始滬港通及深港通每日額度較原來擴大四倍，不過記住，水喉擴大，唔代表走資情況會改善。擴大水喉翌日，港股通買入成交額71億元，賣出成交額78億元，錄得7億元資金淨流出。
Kitty：內地資金對港股成交量一向有大貢獻，走資情況繼續，港股將受壓。但港股點解會無端端唔受內地人歡迎？
林：大媽愛股主要係高科技股份，以及一啲佢哋熟悉嘅股份，例如中國恒大（03333），但呢啲股份已經升咗好多，佢哋開始食胡。
彩兒：仲有啲咩因素令你唔撐港股？
林：港匯連番觸及弱方兌換保證水平，迫使金管局沽美元、買港元；美國加息；港股升咗年幾，以至中美貿易談判唔知發展成點。
淡友：累積升幅多 市恐回調
黎：港股早前升得太多，會回調！香港有加息壓力，因美國聯儲局已加息六次，但香港一次都未加。香港屬全球交易自由度最高嘅市場，資金流走風險相對高，所以港股短線會向下。
Kitty：唔係話香港喺六月會加息咩？
黎：最近美國十年期國債孳息達三厘幾，聯儲局必定要加息，香港亦會跟加。香港加息，會令企業經營成本增加，供樓成本上升，市場流動資金減少。中美貿易談判方面，美國總統特朗普不斷推番前朝政策，例如制裁向美國出口嘅企業，全球經濟唔好，股市點會有運行？
國策軍工股有錢途
彩兒：美國加息又縮表，市場有餘錢谷起股市就奇。
黎：特朗普真係到處辣火頭，包括單方面推翻伊朗核協議，亦將美國駐以色列大使館遷移至耶路撒冷，激嬲巴勒斯坦人，令以巴衝突升溫，所以我估計中東政局會幾混亂，話唔埋會再出現類似九一一嘅恐襲。
Kitty：咁得人驚，買定黃金等着草好唔好？
黎：炒股唔炒市啦。國策股唔錯，趁中國消費升級，靠內需帶動經濟，並提倡去槓桿及供給側結構性改革，睇好醫藥、高科技及環保股。另軍工股會唔錯，各國不斷增加軍備自保，尤其美國，係全球擁有最多軍火嘅國家。
花生友：外圍變數多 難言樂觀
Kitty：你停晒手唔落場，唔覺得悶咩？
陳：個市好亂，太過波動，大家避開吓好啲，我去咗旅行放鬆吓，暫時唔炒出炒入。即使早前特朗普話要放生中興通訊（00763），可能仍有變數。我睇得負面啲。
彩兒：事實上，美國眾議院撥款委員會上周四通過修正案，要求商務部繼續執行對中興通訊嘅制裁。由此可見，特朗普葫蘆裏面賣咩藥，真係唔知。
減磅為上 避出口股
陳：好彩我年初買中好股，回報可觀。
Kitty：你套現晒未？
陳：冇息收、管理層又立立亂嘅股份，我早就沽咗，依家唔適宜揸太多貨。早前聽到中興通訊被美國抵制，即沽出丘鈦科技（01478）等，以及避開出口及電訊等股份。
不過，揸住過百萬元藥業股就唔放住喇，因為我覺得無論市況係好係壞，對呢啲好股都唔會有大影響。
彩兒 Kitty