絲絲講場：創銀梁高美懿退休 「孖生姊妹」歡送
將於今日退休嘅創興銀行（01111）副主席兼董事總經理梁高美懿，原來已經派咗「散水餅」，周四仲約埋一班記者朋友聚吓。
公司為咗歡送梁太，仲特登用唔同顏色嘅扭扭氣球，整咗一個「一比一」大小嘅梁太公仔，神似得嚟又幾盞鬼。再望真啲原來頸上仲有一條吹氣珍珠頸鏈，確係襯番梁太嘅高貴身份，連梁太都忍唔住要同自己嘅「孖生姊妹」，舉起拇指影番張合照添。
交棒前定三大目標
原來梁太交棒前，已經同掌舵人宗建新一齊為銀行鋪路，定下三大目標，首先計劃喺大灣區搞「跨境按揭借貸」服務，有意喺內地買樓嘅港人，或可以喺香港銀行敍做按揭，並以港元結算；同時亦計劃放寬該行內地支行嘅存款門檻至50萬元人民幣，希望吸納更多內地存款客戶。香港方面，梁太話已經聘請顧問，協助精簡香港業務嘅營運工序，提升服務效率。
事實上，梁太已經同同事搞咗「歡送派對」，同事們都爭住送禮物畀佢，佢話最鐘意係某國際連鎖酒店嘅VIP套票，啱晒最鐘意旅行嘅梁太。
余絲韻