絲絲講場：豬肉佬年搵22億 威過庫克

萬洲主要做生產及銷售豬肉食品業務，係全球最大豬肉食品公司。有幾大規模？一日屠宰成14萬隻豬咁啦。萬隆就係佢哋頭號話事人。

以萬主席舊年薪酬睇，計落佢日袋621萬幾港元，以佢24小時都心繫公司計，咁即係連瞓覺發緊夢嘅每一分鐘都袋緊4,318蚊！

萬洲主席帶領集團達標

睇番佢一六年全年薪酬都只係1,700萬美元，即是舊年加薪超過十六倍？原來係多咗一大截2.89億美元股份獎勵，因為萬洲喺萬主席帶領下，舊年嘅成績已達一三年訂落嘅獎賞目標。咁公司舊年賺幾多？年報顯示，核心利潤係10.97億美元。計落萬主席份薪酬，係公司核心利潤嘅26.5%！

萬主席嘅賺錢能力揚威海外，有外電計數，話佢舊年份薪酬，仲多過26位最高人工嘅香港上市公司CEO薪酬總和！仲跑贏舊年袋9,900萬美元嘅Apple教主庫克同埋華爾街最勁嘅高盛舵手布蘭克費恩2,500萬美元份糧！

由當年高中未畢業，喺河南一個屠宰場打工出身，到今時可以砌低科技巨頭與華爾街大鱷，你話幾咁勵志呢可。

余絲韻