絲絲講場：一田CEO落場最愛入袋
一田購物優惠日今個月廿四至廿八日開鑼，一田CEO黃思麗（Susanna）每次都親自視察銷情，仲會落手，原來有個Post佢好想霸嚟做。
執籃？Susanna呻執籃太辛苦，今次盡量唔嘞。咁收銀？啲收銀員工驚佢搞亂條數，唔「侵」佢玩！所以數嚟數去，Susanna最鍾意嘅都係做入袋。雖然暫時未決定係呢次優惠日做咩Post，但佢話點都會霸住入袋「呢份工」先。佢仲話自己今次有「新嘢」做，係咩？因為呢次優惠日有成10間舖參加，所以會多咗搭車咁話喎。
港島推代購送貨
Susanna預計，今次優惠日生意可升8至10%，帶動五月整體生意增長8%。
一田仲推出代購送貨服務，只要喺honestbee嘅網站或者APP落單，買滿200蚊就有專人幫你買嘢兼即日送到，不過目前只得港島區。其他地區呢？Susanna就話要睇吓效果先。
余絲韻