絲絲講場:記者挑機 王曉初神回應

中國聯通(00762)一七年賺多咗好多錢,但其實股本回報率(ROE)連1%都無,董事長王曉初尋日就被日本記者「挑機」,話條數差過王總以前揸過Fit嘅中國移動(00941)同中國電信(00728)!

第20年做電訊業阿頭

面對中移、軟銀、AT&T及數碼通(00315)舊年ROE全部雙位數,王總先坦承聯通確實係差過同行,但隨即話鋒一轉,話睇嘢係睇變化同趨勢,唔可以話今日係咁就永遠都係咁,更以日本經濟為例直線抽擊。

佢話日本二戰後曾一貧如洗,但五、六十年代過後變得好有錢,大家要畀聯通時間,仲話聯通ROE追番全球通訊業平均數「指日可待」!

話時話,王總九九年三月出任中移董事長,○四年底過中電信揸旗,一五年再嚟聯通,眨吓眼做上市中國電訊業龍頭董事長嘅生涯,已經踏入第二十個年頭。一個人做齊晒一個行業主要央企嘅阿頭,王總份CV算係罕見。佢話一路以嚟重點係創造同提升公司嘅價值,不論喺中移、中電信定聯通都盡咗應有責任。

余絲韻