美股升到欲罷不能，帶挈恒指重返50天線之上，唯獨成交得九字頭唔多夠鑊氣，一日未見升穿31,000點上落區的天花板，都係唔好信到十足。下周出季績的騰訊（00700）一洗頹風，昨日升2.9%收報406.2元。「侵侵」退出伊朗核協議的漣漪效應持續，油價重返三年半高位，「三桶油」齊創52周高，帶住個市向上。
中美貿易糾紛沒完沒了，能源股當旺，個別內需股亦有睇頭。近排走勢極佳的統一企業（00220），升過上8.16元創五年高位，上市就快夠半年的日清食品（01475），股價見過4.92元上市新高，升2.4%收報4.59元。今日建議大家睇睇隻維達國際（03331），收市後主席同行政總裁披露曾入市增持。
三月中傳出維達瑞典股東在街外批4,000萬股舊股，之後遇到市況麻麻，維達除跌穿批股價，仲落過12.46元低位。由於成本控制得宜，加上產品組合優化，維達首季毛利較去年第四季改善，今次高管真金白銀入市，睇好之情是路人皆見，大戶之前用13.6元接貨，依家個價差唔多，捧場客應該唔怕買。
家陣今日唔知聽日事，即使係大行專家，聽佢講落注都隨時出事。個幾月前有間外資行搞大型論壇，有個知名策略師所講的重點大約是美國大規模減稅後，財赤惡化會令美元出現以年計的結構性弱勢。言猶在耳，近日新興市場貨幣危機重臨，中東局勢升溫，聯儲局加息可能達四次，令全球游資重投美元懷抱。全世界都要因應美元強勢，重新諗過入市大方向。
人類天生沒有預知未來能力，大行成日話年終指數、52周股價睇幾多，根本得啖笑。參考可以，若信到十足，出事唔好問點解！投資市場風向可以變得好快，唔能夠隨機應變，盡信專家死牛一邊頸，好容易被股海沒頂。
古勝