絲絲講場：Fb朱仔轉Look惹揣測

朱克伯格以往一款短袖灰T恤走天涯，日日當制服着，凍就至多披多件有帽衞衣，呢套「制服」有如佢個人，甚至係公司嘅Statement。

不過，如果有留意上星期Fb舉行年度開發者大會，佢忽然收起晒熟口熟面套灰Tee與藍牛，換上藍色長袖過頭笠毛衫與黑牛，波鞋仍然係Nike，但就由灰轉黑。忽然改形象，就好似公司轉Logo咁，梗有啲嘢……Anyway，新Look都仍貫徹佢一向「普通」風格嘅。

啲衫「普通」，但絕對非一般，就講佢以前件「普通」灰Tee，有時裝精爆料話係意大利名牌Brunello Cucinelli，仲要係特別訂造，每件至少港紙2,730蚊！

35條fb內部問題唔識答

佢衣櫃除咗Tee同衞衣，仲有其他衫嘅，佢上個月出席美國國會聽證會為公司洩密解畫，就成套西裝打埋呔出場。以為佢做齊功課，點知會上有成35條關於Fb內部嘅問題，佢當場答唔出！

事後佢接受訪問，話經此一役，發現公司部分運作自己都唔明。又話作為創辦人，自覺不能接受，話事後立即同團隊坐低，要知番晒乜乜乜。大概係絲絲幻聽，背後嗰句似係「啲嘢我點知得晒啫？我都好無辜o架！」

又講番，朱仔點解日日一樣衫？話費事揀喎。想學佢？咁要背埋佢句「我只係想盡力貢獻社會，唔想嘥時間精力喺啲瑣碎無謂嘢上！」預咗等人問，嗱「貢獻社會」可以睇邊個問，而換成「為公司打拚」、「專注喺你身上」，呢句萬能Key，扮Cool嘅Package包埋。

查實朱仔都係抄嘅，真正元祖係衣櫃有過百件一模一樣Issey Miyake樽領長袖黑Tee嘅Apple已故教主喬布斯！

余絲韻