孖妹S檔案：A股等入摩 老手新秀比炒技

林：國農證券董事總經理 林家亨

黃：財經評論員 黃志陽

蔡：香港程式交易研究中心總裁 蔡嘉民

鍾：理大金融學碩士生 鍾菁

意義解讀：地位獲認同 股份夠穩健

Kitty：金融人咁打得，聽到我哋嘅來電，話要畀個大考驗佢哋，一定好興奮！

彩兒：喺金融界打滾，習慣咗開住個Fight Mode。

（兩位金融專家同兩位金融新秀知道要做20條選擇題，諗都唔諗就話「開始啦！」對佢哋嚟講，答啱八、九成題目應該冇咩難度。）

做A股小測試 幫你長知識：基礎版

做A股小測試 幫你長知識：進階版

分段納入 留意日子

Kitty：其中一條題目講到年內A股入摩嘅重要日子，佢哋就有啲猶豫。

彩兒：A股入摩嘅第一步，將喺六月一日正式實施，納入MSCI新興市場指數比例為2.5%；第二步將喺九月三日正式實施，納入比例提高至5%。

（林家亨一邊輕鬆答題目，一邊分享佢對A股入摩嘅睇法。）

林：A股入摩嘅意義就係對A股身份嘅認同，呢啲被納入股份屬於投資級別，表示比較穩健。一般佢哋市值都超過100億元人民幣，同埋派息都好吸引。

彩兒：有投行提過，被納入嘅A股中，權重較高嘅係金融、地產、食品飲料及醫藥等消費股，包括中國平安（601318.SH）、招商銀行（600036.SH）等。

Kitty：除咗以上板塊，貴州茅台（600519.SH）喺新興市場指數嘅權重都似乎係數一數二。

彩兒：所以，我哋問嘅最後一題，關於邊隻係市值最大嘅A股，都考起佢哋。

林：揀貴州茅台定工商銀行（601398.SH），就要分清市值同股價，貴州茅台股價近680元人民幣，工行股價唔夠6元人民幣，但一家銀行嘅規模都應該大過一個酒莊啩。工行A股市值大過貴州茅台兩倍多。

（惟獨內地長大嘅鍾菁不假思索就答啱。）

鍾：以我所知，四大內銀中，工行業務發展比較好，資金流通量高，多數生意人都鍾意向工行借貸。所以我認為工行進身市值最大嘅A股，係實至名歸。

做A股小測試 幫你長知識：兩個小測試答案

兩代金融人測試得分

投資攻略：內房前景俏 生科動力強

Kitty：你哋依家睇好咩A股？

林：首先教你點揀股。睇AH股溢價，差價愈大，其H股值博率愈高，山東新華製藥股份（00719）就係好例子。其股價過去幾年一直向上，除因良好業績帶動，互聯互通亦有功勞，令流通量增加，AH股差價縮窄，H股相對A股折讓漸減至目前差幅約五成。

雲端醫藥股具潛力

黃：我建議揀啲喺內地上市但香港冇上市嘅股票，所以唔好買銀行同保險股，宜選做晶片及雲端技術嘅高端科技股。

蔡：我年內都有做AH股指數套戥，例如沽追蹤A股嘅新加坡SGX富時A50指數期貨或上海期貨交易所上證50指數期貨（IH50），同時買入國企指數期貨。以上指數均成交量高，流通量足夠，可以做大額交易。惟長線唔得，因有啲AH股溢價或者長期喺度。

彩兒：有咩中資股值得留意？

林：內房股從來不可忽視，雖市場指內地樓市有泡沫，內房積壓大量庫存等，但中國恒大（03333）及碧桂園（02007）各自嘅房屋銷量金額都比香港的三大地產商－－長實集團（01113）、新鴻基地產（00016）及恒基地產（00012）嘅總和要多。雖短線受房產稅去庫存政策影響，投資者觀望內房表現，但長遠受惠剛性需求，內房前景看俏。

林：我揸住中國海外發展（00688）。佢哋一三年投到啟德地皮，每呎地價逾5,000元，加埋建築及其他雜項，每方呎成本僅約1萬元，但新樓以呎價逾2萬元開售，仲唔賺到笑！

彩兒：中美貿易談判持續，中國承諾進一步開放中國經濟及降低關稅，醫藥股回吐，至今仍在低位徘徊。醫藥股會唔會翻生？

林：我最睇好研究生物科技嘅醫藥股，特別係金斯瑞生物科技（01548），若佢研發到新藥，股價會爆上。惟其市盈率超高，逾200倍，且公司唔派息，故投資風險唔細。行業龍頭國藥控股（01099）最近公布嘅業績遜預期，股價由45元插至30幾元，但我仍樂觀。其市盈率偏低，業績可望有溫和增長。

Kitty：鍾菁，你喺浙江出世，投資A股應有一手。

鍾：我曾買過喺浙江上市嘅化工及製藥股，因聽講公司研發咗某隻藥，最後賺到少少錢。惟投機味太濃，之後再唔敢亂入市。我睇好生物醫藥、化工及軍工等國策。我聽同學講，中國國債有異樣，債價升唔少，我同意中國國債確有投資價值，因其比較其他國家債券，有較高收益及投資風險較低。買中國國債可分散風險，料其債價仍有得上。