Market Insight：中資航空股或現反彈
今年魚缸最具殺傷力，唔係大行分析員唱好唱淡，反而係每晚當大家好夢正酣時，美國總統「侵侵」喺Twitter發表的治國大計。上星期美國商務部用涉及間諜活動的嚴重指控中國手機生產商，中興通訊（00763）躺着也中槍，要即時拉閘。
基於唔少基金因為中國5G概念而揸重中興，如今復牌無期，惟有減持相關板塊，故上周見牽連手遊、軟件及雲端生意的科技股齊齊被洗倉。
周末外媒引述美國商務部大員Will Reinert指，中興事件無轉圜餘地，會唔會只係開天索價，等中方落地還錢？得個估字。
國產手機發展添變數
萬一美國企業真係七年唔可以供應零件畀中興，連智能電話市佔率達八成八的Android，都唔再可以預載中興產品之內，咁唔單止中興瓜得，近年打低價路線，中國智能手機在全球市佔率不斷上升，在完全沒有核心軟件支持的背景，真係可以一鋪打殘晒！
執筆期間傳來美國財長話考慮來華磋商貿易問題，並指對中美貿易問題達成共識持謹慎樂觀態度，口風偏向正面，但又係咪又畀地雷各位股民踩，就要做事後孔明。
從投資角度睇，過去一個月全球股市投資信心下降，再持續多一個月，第二季全球經濟必將受影響，上半年由盛轉衰的格局一旦確認，第三季變數更大，十一月美國中期選舉能否容得下這個挑戰？最怕係玩出火一發不可收拾。如此推斷下，美國討價還價都有個譜。真係想博次季全球股市調整完成的話，亦宜盡量選擇期權或衍生工具以小博大，唔好瞓身押注免一鋪清袋！
板塊方面，見到三隻中資航空股呢期好似食咗瀉藥，股價反覆向下尋底，皆因油價作怪。單係四月中旬以來，油價曾累升超過一成。其實，影響航空股表現有兩大重要因素，其一係人民幣貶值，皆因航空股主要收入係人民幣，而主要資本開支係美元；其次係油價表現，油價飆升意味航油成本上升，不利毛利率表現。
「侵侵」動口 瞄準油價
近日「侵侵」咆哮話油價被人為推高既無好處亦不能接受，致使油價由三年高位回吐。到底「侵侵」係純出口術抑或真係諗要釋放戰略石油儲備來干預油價，就要等着瞧。
回說三大中資航空股，其實三者技術上14天RSI已明顯出現背馳，如短線無新的不利因素，照計有博反彈條件。以中國國航（00753）為例，若以去年九月下旬股價由9.3元水平起步，至今年二月見高位12.86元，以調整升幅的0.5計算，照計落到9.5元水平已經差唔多，上周五股價收報9.3元，短線留意博反彈機會，先睇上唔上得番10元樓上，再諗係咪反手沽。
古勝