絲絲講場：國產董事全球最Young？

早前有外媒對全球97個國家同地區，約4.6萬家上市公司進行比較，全球上市公司董事平均年齡57.2歲。當中首次公開招股（IPO）公司董事有年輕化趨勢，尤其喺一七年度上市嘅企業。

英雄互娛CEO年僅31歲

而排行榜入面，中國嘅上市公司董事係最後生，平均年齡50.2歲，正正因為中國手機遊戲同流動裝置等一大批初創科技公司，佢哋嘅董事年齡都係30幾歲，好似移動電競遊戲開發商英雄互娛嘅CEO及董事吳旦今年31歲，仲有遊戲公司盛訊達嘅董事陳湧銳今年亦只係34歲，所以平均年齡就拉低晒。

日本同美國嘅董事平均年齡就大啲嘞，分別係59.5歲同61.3歲。不過，呢兩個國家近年亦都湧現咗好多後生董事，好似舊年先上市嘅日本最大嘅生活服務分享公司Sharing Technology嘅引字圭祐同Facebook嘅朱克伯格都只不過分別得嗰33歲同34歲咋！

日老牌公司平均70歲

但年紀大嘅董事勝在有管理經驗，好似日本老牌公司佳能同信越，佢哋嘅董事年齡平均70歲！黎巴嫩嘅上市公司董事平均年齡都接近65歲，但呢類中東國家上市公司數量較少，年齡波幅會較大。

余絲韻