Market Insight：資金避險 要搵內需股

以為個市可以捱過結算，但Facebook用戶資料洩密醜聞愈演愈烈，老總朱仔登報道歉兼應承出席國會聽證都止唔到血，仲累埋街坊令一眾科技股冧檔。昨日港股跟美股低開後，愈踩愈深，恒指勁跌768點收報30,022點。

「侵侵」癲得嚟有部署

批完股反彈掂到裂口又散過的騰訊，原來高管在周二齊齊減磅。昨日轉四月合約的期指市場，已率先失守三萬點關口，技術上，三月初低位29,852點是不容有失，否則四月返嚟，想個市復活都幾難。

中美貿易戰，在雙方叫陣過後，進入討價還價搵着數階段，最終能否大事化小？古勝唔敢樂觀。一個出口大國同一個消費大國，有根深柢固的關係，中美每年三千幾億美金貿易差距，斷唔可能開兩次會，靠多買半導體，入口多少少糧食可以擺平。

睇「侵侵」上場以來，首次訪華整個「百日計劃」，擺出先禮後兵姿態，實際等白宮換人完成，鷹派人士坐定定，跟手就推鋼鐵鋁材關稅，轉頭又畀盟友豁免，以為化干戈為玉帛，點知引用「301調查」結果為由，對600億美元的中國貨徵關稅。人人笑佢太瘋癲，實際卻又一步一步兌現到選舉時大美國主義的主張，大方向始終咬實貿易逆差最大來源地，要同中國過唔去。

貿易戰陰霾濃罩，內地今年要維持6.5%GDP增長，重任無疑落到推動內需身上。昨日千三隻股票見紅的大跌市，正正內需板塊一枝獨秀，統一企業（00220）業績對辦，多賺四成四，股價衝過上7.01元逾一個月高位，早幾日因為貿易戰消息拖累的豬肉佬萬洲國際（00288）都見技術反彈，升四格收報8.42元。

乳業股蒙牛（02319）業績前走勢已經見改善，上周五低位22.6元到昨日收市價25.15元，彈咗足足一成一。舊年公司虧轉盈，賺20.4億元人仔，經已交番出一四、一五年度業績高峰的八成幾，高層趁機派定心丸，話經歷人事革新，改善供應鏈及去庫存以提升產能後，今年有信心收入錄得雙位數增長。

蒙牛業績重返正軌

大行中，最精神分裂都算係大摩，話舊年因為營運成本較預期高，故業績稍低過佢哋估計，不過目標價睇30元仍建議增持。花旗提出蒙牛去年現金流增長強勁，下半年毛利率表現亦有改善，目標價睇28.84元。

舊年累升五成六的蒙牛，今年一副高位整固姿態，在21.85至27.25元間浮沉。展望貿戰陰霾下大家搵內需股避險，舊年業績對辦，展望今年可更上一層樓，包括附屬公司雅士利（01230）亦好大機會收支平衡，都是睇好蒙牛的原因。

古勝