絲絲講場：順豐攞正牌用無人機送貨
深圳A股順豐控股（002352.SZ）尋日發表通告話，呢個禮拜二，旗下子公司獲民航管理部門頒發內地首張無人機航空營運許可證。
內地首家 股價漲2.6%
根據呢張許可證嘅規定，順豐物流無人機可以喺民航局批准嘅試點區域內使用無人機開展物流配送，咁即係話順豐攞正牌，成為內地第一間合法無人機速遞公司。
順豐搶先京東物流、菜鳥物流等用無人機送貨，想將通過無人機實現航空物流網絡幹支線對接，構建「大型有人運輸機、支線大型無人機、末端小型無人機」三段式空運網，實現36小時通達內地，加強公司「天網、地網、信息網」三網合一嘅網絡資源優勢。
順豐A股即時得益，尋日收升2.63%，報50.02元人仔！
余絲韻