Market Insight：滙控布局內地享優勢
港股昨日一度失守30,000點關，惟其後在消息引述美國財長指有信心與中國就解決貿易問題達成協議，騰訊（00700）止跌回升，帶動恒指收復失地，最終升239點收報30,548點，於100天線（30,397點）水平現爭持。
騰訊上周的大股東售股係來得比較突然，但其實公司基本面未有大改變。反而，可以留意騰訊喺一二年以3.3億美元購入48.4%股權的Epic Games，其最近所開發的遊戲《Fortnite》在美國大受歡迎，據講已有超過4,500萬玩家參與此遊戲，更有專業玩家透過此遊戲單月錄得50萬美元收入。
基金為股王焗沽貨
另有一位擁有超過2,800萬名訂戶的YouTuber，召集一班玩家在YouTube直播玩該遊戲，吸引逾100萬人線上觀看。當稍後時間推出Android版本，相信玩家數目會持續上升。雖然外媒廣泛報道呢個遊戲幾咁有威力，惟騰訊股價就受着減持消息困擾。不過，以昨日騰訊股價表現來看，未有失守上周五低位兼且高收作結，唔排除已有聰明錢在部署。
老實講，依家中美貿易糾紛點發展，會唔會再拖累個市，冇人估到，但不能忽略係，騰訊大股東剛完成800億元的配售，規模咁大真係唔簡單，而且大股東承諾三年內不再減持，照計對騰訊前景實在唔使太過悲觀。反而，唔知係唔係因為基金呢期狂接騰訊，所以要減持其他重磅股，見到最近中資金融股持續現沽壓，想博業績就要睇路了。
回說中美貿易戰，美國睇中的，其一是中國的汽車市場，其二是金融市場。六月A股入摩，呢個時候將雙方分歧擺上台傾，要中國進一步開放金融市場，動機路人皆見。針對汽車業，其實內地財金官員早在今年初已於不同場合放風聲，話未來會再降低汽車進口關稅。
雖則話即使真係減進口汽車關稅，受惠的相信會是高端進口汽車，對於佔總大部分市場份額的內地中低端汽車市場衝擊未必太大，但點都好，個餅多咗人爭，就點都差啲，所以若然想買汽車股，建議忍一忍手，等埋中美貿易討論的結果，再見機行事。
搶先捕捉金融商機
至於開放金融市場，其實都喺意料之內。事實上，中國都想外資來華投資，但要資金入場，就要提供多啲投資機會，同加強對外來資金的保障，呢啲係正常不過的要求。可以預期，未來外資參股內地金融業的限制會大大消除，對於早在內地布局的國際金融機構而言，也許苦等多年，終於可迎來真正的大商機。
類似滙豐控股（00005），內險巨企已成主要股東，也許未來在捕捉內地金融市場商機方面將會更加順利，難得近日股價震到落75元，坐收5厘息，股價再落的話，實力投資者大可考慮人棄我取！
古勝