絲絲講場：賣零食都玩Crossover 四洲踩過界搞手遊

就咁嘅，四洲同內地電競商英雄互娛集團簽戰略合作協議，玩Crossover，雙方合作包括產品推廣、品牌互動、遊戲IP植入等，總之係要打大中華市場。

與內地電競商合作

聽講，今年六月內地電競商英雄互娛會推內地版《全民槍戰3》上線，到時真係會將四洲嗰隻牛奶仔同紫菜植入Game內，同玩家互動咁話喎。冇錯，係牛奶仔同紫菜，佢哋仲特別整咗隻「槍戰版四洲牛奶仔」添！

到時，仲有特別版嘅「四洲牛奶飲品」喺內地同步上市，嚟襯番個Game！唔少得嘅係一齊搞個抽獎諸如此類。

雙方尋日喺四洲間「Okashi Galleria」專門店內舉行簽約儀式，為配合儀式，仲將間舖以電競主題重新布置，配晒個Game嘅視覺布局。

發布會現場唔只有「牛奶仔」，仲有「槍姐Jessica」出場，Game迷仲可以喺舖內嘅宣傳品掃描Download個Game即場玩。

即係咁，第時打機開緊槍搏殺時，畫面會唔會忽然飛啲甘栗、梳打餅，甚至甘大滋出嚟？諗落都……Well，已超乎絲絲想像。

余絲韻