絲絲講場：英記招股請飲茶價值八萬五

現場擺咗鎮店之寶普洱茶餅出嚟，價值高達八萬五！英記茶莊首席茶師梁家棟話，茶餅大概半斤重，一個人一般可以嘆三個月。

英記茶莊行政總裁兼執行董事陳根源稱，呢餅鎮店普洱茶餅係英記第二代時買落，擺咗成五十幾六十年，呢排先拎出嚟，所以好矜貴；不過佢話相比起內地嘅炒價，就小巫見大巫啦！絲絲睇番資料，原來舊年仕宏拍賣春季拍會中，有餅普洱茶嘅成交價連佣金高達約65萬蚊！

一手入場費2727元

啲茶葉放咁耐又唔發霉有咩秘訣？陳根源話係商業秘密，唔講得！雖然偷唔到師，但英記茶莊都好大方，八萬幾銀嘅茶葉照拎出嚟沖畀出席人士歎！連保薦人凱基金融亞洲董事總經理及投資銀行部門主管關卓啟（Ringo）都邊飲邊讚「好香」、「好飲」！

講番招股，英記茶莊一手5,000股，入場費盛惠2,727.21元。今次佢哋計劃發行9,000萬股，當中10%作公開發售，招股價由0.48至0.54元，集資最多4,860萬元，預計四月十六日喺創業板上市。今次招股，凱基金融亞洲為獨家保薦人、獨家全球協調人、獨家帳簿管理人兼獨家牽頭經理人。

余絲韻