亞馬遜舵手貝索斯去美國探險家俱樂部年會攞獎，大家即知多佢三樣嘢：佢會掟身家去探索太陽系；佢好錫阿媽，會帶埋阿媽上太空；同埋佢係食蜥蜴嘅。
除咗亞馬遜，貝索斯亦創辦咗間探索太空嘅公司Blue Origin。早幾日佢出席探險家俱樂部年會晚宴，就獲頒「艾德靈太空探索獎」，表揚佢呢方面嘅成就。
晚宴上，佢講明已經陸續將自己喺亞馬遜嘅「派彩」（即佢賺到嘅身家），投放去探索太陽系，希望能降低大家嘅太空「入場費」。
查實貝索斯之前已經不斷將亞馬遜股票套現，每年十億十億美元咁，掟去實現佢嘅太空夢。佢係全球首富，現時身家132億美元（約1,029億港元），當中九成幾係亞馬遜股票。就連當晚晚宴隔籬枱嘅一位瑞典藥業大亨都話，貝索斯若留夠錢照顧阿媽後，其餘睇怕會掟晒上太空！
之不過，貝索斯係唔會賴低佢阿媽嘅，事關佢媽媽Jackie Bezos一早講咗要跟埋上太空。
唔好睇小Auntie Bezos今年七十一歲，佢早前已跟過船出海撈火箭引擎，Auntie仲係首位登上嗰艘探險船嘅女士，搞到船長要落令收起晒船上貼出來嘅鹹相！
今次晚宴貝索斯仲食蜥蜴，仲要係原條上。晚宴嘅美食仲有蜘蛛同曱甴，一支支籤篤住上。驚驚？咁冇冒險精神，點做全球首富呀！
余絲韻