孖妹S檔案:貿戰震全球 教你炒股唔使愁

佢嘅一句話,搞到環球股市風雲變色。所指何人,大家都應該估到。自○二年,美國再次掀起全球貿易戰危機。上周四,美國簽署落實向進口鋁鋼徵收10至25%關稅。呢個舉動係靠嚇,定係警號?等孖妹再次變身小偵探,查明係咪會爆發真‧全球貿易戰!

鄺:凱基證券執行董事及研究部主管 鄺民彬

王:星展銀行財資市場部(大中華地區)董事總經理 王良享

會爆貿戰? 全面開打機會料微

彩兒:要形容美國總統特朗普,我會話,夠爆!前個禮拜,佢預告向進口鋁鋼徵收重關稅,上周四就快手簽署落實。

Kitty:希望佢每次爆肚,都唔好鑊鑊新鮮、鑊鑊甘。

彩兒:今次我撐你!佢嘅一句話,足以令市場有好多揣測,令股市波動。例如,上周二美國白宮首席經濟顧問科恩宣布辭職,市場解讀為華爾街都唔撐特朗普嘅關稅政策,令上周三道指低開300點。另疑捲入貿易戰嘅股份,包括通用汽車、波音公司及卡特彼勒股價都應聲下跌。

Kitty:向進口鋁鋼徵收重關稅,係咪唔好?

彩兒:科恩覺得關稅令美股下跌,抵銷稅制改革嘅經濟成效。

鄺:事出必有因。特朗普宣揚美國第一,偏向維護本土利益,提倡保護主義政策。無疑中國出口美國嘅貨量都幾多,所以就貿易不平等問題,美國率先推出鋁鋼進口關稅。因政策有利有弊,美國本土行業亦部分受惠,部分被拖累,聽到美國本土都有反對聲音。

美政治變數大 有排煩

彩兒:呢個風波會牽連幾大,為期幾耐?

鄺:呢類保護政策可以延伸到其他行業。事態發展,要睇特朗普係咪一意孤行,同埋美國與貿易夥伴之間嘅拉扯,甚或係報復而定,所以可以有排搞。但若有咩政治變化,如美國中期選舉共和黨落敗,成件事就會有突變!

Kitty:唔使政治變化,中美關係本身就有好大變數。

彩兒:呢啲叫政治手腕。

王:一七年五月,中國先達成協議,幫助美國牛肉企業、電子支付服務商及天然氣出口商等,進入中國市場,所以我估美國應該唔會想一下子拖垮晒所有嘢,暫時爆發全面全球貿易戰嘅機會唔大。

未必瞄準超敏感行業

王:依家針對嘅鋁鋼行業,所佔嘅貿易額唔算高,估計特朗普都係想有個交代,履行競選承諾,唔會Target啲超級敏感嘅行業。其實美國更精明嘅做法係,針對傾銷行為,實施懲罰性關稅。

Kitty:我仍唔放心。對上○二年,美國前總統喬治布殊宣布,對歐洲、亞洲及南美進口嘅大部分鋼鐵實施8至30%關稅,股市下挫,我怕事件會重演。

王:你要知,九八至○三年處通縮環境,股市低迷係好正常,反映亞洲金融風暴對香港股市嘅影響深遠。再者,當時中國加入世界貿易組織只有兩年,美國推行嘅保護政策,應該唔係針對中國。

有咩影響? 貿戰恐損美企盈利

彩兒:美國總統上周四簽署落實向進口鋁鋼徵收10至25%關稅,同時基於國家安全考慮,美國兩大貿易夥伴加拿大及墨西哥等獲得豁免。

Kitty:如果剩係打中國,達唔達到佢預期目標?

王:中國出口佔全球出口嘅比重高,所以並非特朗普講咁易打。不過,如果要推行極端保護政策,就必打中國先成功。

彩兒:美國最大嘅進口國是中國,一六年進口值達3,850億美元,第二大係墨西哥,但其進口值比中國嘅少830億美元。至於美國最大嘅出口國,就係今次獲優待嘅加拿大同墨西哥,美國對兩國一六年嘅出口值分別達2,660億美元及2,290億美元,遠遠拋離屈居第三嘅中國逾一倍。

Kitty:佔全美進口值愈高,就愈被美國視為衰仔?

王:美國嘅巨額赤字,中國佔唔少。

彩兒:特朗普Care嘅係貿易逆差!美國嘅貿易夥伴中,美國對中國嘅貿易逆差最大,簡單講,就係美國對中國的進口價值大於其出口,所以感覺美國人嘅錢被中國搶走,好蝕底。一七年美中貿易逆差高達至2,758億美元,係近50年對華逆差最高嘅一年。

Apple或硬啃稅買華貨

彩兒:美國人口調查與統計局顯示,美國一月貿易赤字升5%,達566億美元。當中,美中貨品貿易逆差按月擴大16.9%,達360億美元;美加貨品貿易逆差按月擴大63.6%,達36億美元;美歐貨品貿易逆差按月縮13.9%,達136億美元。比較貢獻美國貨品貿赤數值,中國仲唔係一哥?

王:然而,目前美國都避重就輕,Target鋁鋼行業啫,所以引發全面貿易戰嘅機會係唔大!

彩兒:中國鋁鋼出口美國僅值約100億美元,對比所有中國出口美國總值逾5,000億美元,微不足道。

Kitty:美國出咩招,先係玩認真?

彩兒:中國主要向美國出口嘅貨品包括通訊設備、電腦配件、服裝及半導體等,所以若美國全面打貿易戰,仲唔對準呢啲行業咩!

王:不過,美國相關行業都會好慘。通訊設備包括美國蘋果公司(Apple Inc.)手機配件,如果呢啲配件進口關稅貴咗,如配件成本由10蚊加到12蚊,蘋果公司自然賺少咗。始終,喺美國生產同類配件嘅機會成本會較大,所以估計公司短期內只好硬啃關稅,照舊進口中國貨。

彩兒:美國主要向中國出口嘅貨品包括航天設備、農產品等,若中國還手,相關嘅美國公司就弊。

華農產品具籌碼反擊

Kitty:究竟中國有幾多籌碼喺手?

王:中國完全有條件還拖。單係美國出口去中國嘅大豆同高粱,其實,中國可以選擇唔採購美國進口嘅農產品,揀向巴西或委內瑞拉等地農產品商採購。

Kitty:大豆同高粱係美國主要出口商品類別。中國亦係美國高粱最大進口國,佔其高粱出口量近八成。剩睇大豆同高粱,中美邊個依賴邊個,仲唔呼之欲出?

王:受累行業仲包括美國汽車公司等。

彩兒:波音公司將受鋁成本急升影響。若中國反擊,再唔同波音簽約,轉同歐洲公司空中巴士合作,波音咪玩完?

炒乜股好? 華谷內需 利環保互網

Kitty:對於美國嘅開戰,中國點可以坐以待斃?

鄺:中國面對美國嘅強硬姿態,最好將出口分流去其他國家,唔好依賴美國。中國一直都想開拓新興市場令市場更多元化啦。

同時,中國係需要谷內需彌補出口損失,例如提供消費折扣。然而,受惠人均收入增加,提振內需指日可待,投資者可以留意互聯網、環保、醫療保健及教育股。

Kitty:呢啲股份幾時入至啱?

鄺:低撈高沽最好。今年一月同二月,恒指波幅都超過3,000點,我估港股會繼續係波動市,今年全年表現唔會追到一七年。如果投資者習慣長期睇住大市,可以睇近啲目標價嘅,同埋出入多幾次。單係重磅股,例如騰訊控股(00700)、香港交易所(00388)及中國平安(02318),佢哋每日上落都可以達4%。

出口資源金屬忌沾手

彩兒:中國靠內需,可唔可以完全抵銷貿易戰嘅傷害?

王:我覺得唔可以。然而,無論貿易戰最終點樣發展,互聯網及通訊行業所受嘅影響最細。而消費及醫療股都會係今年焦點。

今年恒指應該會平穩發展,甚至升一成左右,目標係33,000點。港股市盈率於現階段都算平,因全球增長唔見有逆轉,且今次事件只係局部影響,香港同內地以至亞洲,一七年嘅企業盈利增長都錄雙位數,今年增長速度有望持續。萬一全面嘅貿易戰展開,港股最多都係跌10%。

鄺:多國央行收緊水,投資者都唔會咁進取。貿易保護政策始終係傷人不利己,大家要密切注意事態發展,宜先避開出口、資源及金屬類股份喇!

Kitty 彩兒