Market Insight：比亞迪有力重返高位

港股老實不客氣，趁美國貿易戰兒戲的序幕，大市即刻炒番上10天線樓上，上周五升341點收報30,996點，以全個星期高位收市。可惜成交唔夠1,000億元。由於收市後美國出就業數據，反映大戶對港股後市其實仲係十五十六，未揸定主意。

A股為搶客打茅波

香港全力催谷同股不同權，另一邊廂，深交所大員話A股改革，給予中資科技股回歸母體，是今年重中之重的工作。內地傳緊畀同股不同權及科技巨擘行特快通道打茅波，或者先以CDR（中國預託證券）形式上市。科技股做好，舜宇光學（02382）一度炒上144.4元，返回去年十一月以來最高位，最終升7.4%；瑞聲科技（02018）亦升5.6%。

二月美國非農就業數據超額完成，上周五道指勁升440點。值得留意的是，十年期美債孳息率一度觸及2.9厘高位，惟股市反應不大，似乎華爾街開始消化今年加息可能多於三次的機會。美股恐慌指數VIX也回到15樓下，乃二月初大跌市以來最低水平，料有助港股進一步反彈。

內地工信部提出傳統燃油汽車退場計劃，中國汽車市場改朝換代，進入得新能源車技術得天下的環境。今年吉利汽車（00175）母公司浙江吉利控股，估計斥資近90億美元購入平治母公司戴姆勒9.69%的股份，成為單一最大股東，無非是看上戴姆勒在電池管理技術領先。

不過，交易之後的發展，吉汽母公司的如意算盤打唔得得響，有待時間觀察，但暫時睇嚟發展唔係想像中順利，因為入股競爭對手戴姆勒，吉汽母企點名的富豪汽車CEO，就畀富豪集團（AB Volvo）拒絕連任集團董事。

政府支持自家技術

另一方面，戴姆勒行政總裁話同吉汽母企發展更密切合作關係，惟任何具體合作都需要得到戴姆勒現有在中國的合作夥伴，即係北京汽車（01958）及比亞迪股份（01211）同意。吉汽母企使咁多錢，換來咁官腔的回應，肯定無癮到極。

話說回頭，比亞迪作為中國主要充電池生產商，以及發展電動車的鼻祖，睇好中國近3億輛汽車換成純電動車，無理由長線唔將中國自家技術研發的電動車廠放入投資組合。

睇番比亞迪股價去年十月衝上83.7元之後，在61.45至77.75元之間在長方形內橫行多時，距離阻力只係3、4蚊，只要破頂有機會將上落區間推高一級。趁市況好番，挑戰番去年十月高位並唔出奇。

古勝