Market Insight：手機產業競爭勢激化

年初港股牛氣沖天，魚缸內人人如癡如醉，二月初全球股市冷風吹襲，在美債息抽升下，環球股市火燒連環船，普遍錄得逾一成跌幅，港股短短幾日隊過四千點。

古勝同班芬佬朋友做個非正式統計，大部分都無乜大礙，一來年初贏到開巷，有足夠緩衝，心底裏只當回吐係一次抽水。不過，更多人係早已見到恒指由兩萬八點起步破頂，累積升幅驚人，feel到唔多妥，早透過衍生工具對沖倉底，成功全身而退。

考慮食胡 等執平貨

二月期指、期權及場外OTC都已經完成結算，現貨成交開始縮，後市得唔得，睇嚟三月見真章機會好大。雖然昨日個市彈得唔錯，但古勝都係覺得如果手上有賺錢貨，計一計數無壞。引發環球股市回吐的始作俑者，十年期美債息連日企住2.83至2.94厘上落，君子不立危牆之下，如果債息衝上3厘而無引發股市出現大幅調整，到時先將手頭閒錢慢慢執平貨未遲，好過依家衝咗入去，睇住債息個心日日十五十六。

昨日大市反彈，亦結束咗北水一連兩日淨流出的紀錄，港股通（滬深）有番32.2億元人仔淨流入港股。騰訊（00700）及港交所（00388）兩隻大媽至愛，分別有3.4%及2.6%升幅，跑贏大市。軟件股火燒冷灶，IGG（00799）及金山軟件（03888）分別升7.8%及5.9%，都見逾一個月高位。

早兩日內地電訊巨擘、華為消費者業務CEO余承東話，一至兩年內要超越蘋果公司，追趕一哥南韓三星，揚言畀多四至五年時間，有信心砌低兩個巨頭，成為全球手機界龍頭。智能手機愈來愈普及，市場開始像以往的個人電腦市場（PC）般進入飽和期。

小米上市 港股嗒糖

去年是智能手機面世以來首次出現出貨量減少的年頭，可見市場競爭已進入白熱化，到底最後蘋果公司同三星兩個走高技術貴價路線，抑或像國產手機靠薄利多銷能殺出重圍？有一點可以肯定，借鑑PC經驗，去到五大打後的位置，響飽和市場上要搵食唔易，好多蝕住做，更會做做吓摺埋。

今年港交所力谷同股不同權公司上市，主要招攬上市對象之一，去年手機出貨量排第五的小米，傳聞會以「A+H」同步上市方式招股。一個趕住招攬幾間中資獨角獸來港上市，另一個等了又等，一心要發揮最大集資功能，盡搵子彈去打仗，真係「神女有心，襄王亦有夢」，依家就只係睇下半年個市就唔就。

古勝