絲絲講場：開銀行戶口 「離地」一樣得
中信銀行（國際）宣布推出手機流動銀行程式，可隨時隨地遙距開戶，誇張到請埋「太空人」造勢，呢位「太空客戶」話自己喺太空無機會返地球管理資產，用佢哋個App就可隨時「離地」開戶口喎。
手機可做定存兌外幣
想試吓有幾「離地」？只需要用佢哋嘅手機程式掃描自己張身份證，再影張自拍確認身份，最後填寫簡單個人資料就得，整個過程只需15分鐘，毋須任何文件，連住址證明都唔使。
不過暫時只支援用香港身份證開戶，至於內地身份證開戶有望今年內推出。開戶之後仲可以做定期同兌換外幣，日後仲會增設開立投資戶口、股票交易以及投資基金等功能。
中信銀行（國際）執行董事簡吳秋玉透露，公司仲考慮緊係咪要申請虛擬銀行牌照，如果真係成事，公司會全面檢討銀行分行嘅實際功能，或者會改以「旗艦店」方式營運，協助客戶使用該行服務。
余絲韻