絲絲講場：Ben Sir教「投資」絕橋 「畀家用屋企博父幹上車」

蝕得起先好買股票

咩話？「畀」係支出嚟喎，咁點儲錢呀？大學前講師歐陽偉豪（Ben Sir）話，畀家用其實係一項投資，只要畀咗家用，親子關係好，咁就容易有「父幹」，第時份首期會大份啲喎！

講到買股票，Ben Sir建議可以用十分之一嘅收入來買，但要抱住「買定唔買，蝕得起先好買」嘅態度來投資，仲話衍生工具就唔建議掂喇。另外，仲要儲起收入十分之一以備不時之需，不過最重要都係畀家用！

至於證監會主席唐家成嘅理財哲學，就係喺屋企做「財爺」，佢每年都為屋企制訂「財政預算案」，計定來年收入、開支幾多。佢話呢招係學自佢媽媽，佢媽媽有本帳簿記低晒屋企日常開支，佢於是照辦煮碗。

小學生用錢分三份

佢仲自爆，結咗婚三十八年，都係Keep住每星期畀家用太太，成頭家係太太打理嘅。佢話人就好比公司，要「Run得好」就要睇住盤數，量入為出咁話。

不過，絲絲最欣賞嘅係全場年紀最細嘅嘉賓嘅理財心得。呢位8歲小學生謝樂怡話，佢將零用錢分三份：一份儲起，有啲儲落八達通，有啲就入豬仔錢罌；一份就用嚟買嘢，不過佢會諗清楚先買；另一份就捐出去。佢仲好興奮咁話畀大家聽，佢依家已經儲到40幾蚊喇！

余絲韻