Market Insight：中移基本因素穩定

友邦保險（01299）上季新業務價值增長勝預期，派息亦符預期，故見績後股價逆市向好。無可否認，友邦在內地的業務發展較國際同業具優勢，加上派息逐年增加，若對內地的保險業管理水平有保留，但又睇好內地生活水平改善以及保險市場的增長前景，友邦會是不俗的選擇，難怪吸引一班股友長期捧場。

超威納入觀察名單

昨日提及的比亞迪（01211），其A股公司發出業績快報，預期去年純利按年跌20%至40.57億元人仔，符合早前所發的盈警預測。綜合券商最新評價，瑞信維持跑贏大市評級，目標價睇82元；美銀美林維持買入評級，目標價81元；花旗同予買入評級，目標價97.8元。昨日比亞迪回吐，收報73.15元，跌2.1%。

電池股方面，留意到獲天能動力（00819）入股的超威動力（00951）上周配股集資約5.9億元，用作一般營運資金，發行價4.48元。上周股價曾經落過4.75元，之後曾反彈上5元樓上，昨日收報4.92元，跌2.1%。

其實呢隻股除咗大股東、基金主要股東、天能同今次認購配股的投資者，估計街貨都唔係太散，要炒得起其實唔難。不妨留意嚟緊業績會否報佳音，以及受惠於電動車帶動電池需求的程度有多大，可以納入觀察名單。

利息向上，債市唔掂，可攻可守的實力個股數目大減。升市唔多升，跌市照跟跌的藍籌股中國移動（00941），最近一度失守73元。睇圖股價已失守77至78元支持位，跌穿了77至84元的上落區，支持位下移，會否在70元關現支持，尚須觀察。

鐵塔上市或有進展

不過，技術走勢上，中移14日RSI一度跌穿30落入超賣區，息率亦唔差，哪管外圍風吹雨打，集團作為內地14億人口的主要移動服務供應商的地位難有對手。何況三大電訊商分拆鐵塔公司上市一事，拖咁耐照計今年可能有眉目，再加埋中移獲納國指成分股等因素，除非預期全世界股市嚟緊都冚包散，又或者嚟緊內地電訊產業政策會有巨變，否則即使是市況有震盪，係咪需要對呢隻現金牛咁悲觀？

古勝只係以事論事，當然亦唔排除在交易層面，有部分慣常以Long Short股票圖利的芬佬，會視中移為熱門Short貨對象，勝在波幅有預算兼具流通量。姑勿論如何，純睇中移走勢，無可否認係曳咗，但喺基本面未見咩大變情況下，不妨等確認咗初步支持，再留意博反彈機會。

古勝