絲絲講場：維珍妮主席多咗個好幫手

現年22歲嘅Samson主修統計學，今年剛喺英國倫敦大學畢業。佢一畢業就即刻返嚟幫爸爸手，認真孝順。Samson好謙虛話入咗集團唔係好耐，各方面都會畀心機學，希望各位多多指教。

細仔今年加入集團

雖然話細仔Samson今年先加入集團，但查實佢由12歲開始，每年暑假都會去集團工廠幫手o架！集團投資者關係總監區慧婷（Jennifer）仲大讚Samson勤奮，一畢業就跟住洪主席周圍飛，巡廠、開會所有嘢都落手落力參與。

囝囝咁幫得手，咁洪主席有冇交棒打算？Samson即刻搶答話，仲有好多嘢要跟爸爸學，爸爸冇得咁早退休o架！洪主席就話，遲吓先諗。

阿仔返咗嚟幫手，咁三個女呢？洪生話，喺日本早稻田大學畢業嘅大女，早年嫁咗，仲做咗媽媽，依家專注湊小朋友，不過集團有需要時亦會幫手翻譯（絲絲所知，維珍妮引入咗新嘅日本大客）；至於二女就負責管理店舖；三女就熱愛讀書，依家喺巴黎經濟學院攻讀緊經濟碩士，遲吓仲打算讀埋博士添！

余絲韻