絲絲講場：11歲仔出書教炒Bitcoin

講緊嘅就係美國嘅Andrew Courey，佢讀緊Grade 6（大概等於香港嘅中一），佢寫咗本57頁嘅書《Early Bird Gets The Bitcoin》，係一本教人投資比特幣嘅終極指南！上月以電子書形式出版，剛剛仲出埋實體書添。

唔好睇小，本書係大人細路都啱！好似講到「Distributed Ledger Technology Blockchain（分布分類帳技術區塊鏈）」，Courey解釋即係似一個可以同人分享、但只能以買賣比特幣來編修嘅Docs File。

轉揸亞馬遜夠穩陣

至於「Bitcoin Wallet（比特幣錢包）」內任何人都可接觸到嘅Public Key同只有擁有者可以掂到嘅Private Key，佢比喻做一個信箱，郵差可以派信到任何信箱，但就只有揸鎖匙嘅信箱主人先可以攞到信。

另一方面，仲有啲趣味小知識，例如網上挖比特幣所耗能源，估計多過159個國家所用能源嘅總和！

Courey自己勁炒比特幣？佢之前確係買過比特幣同以太幣，但依家只揸住0.00222個比特幣（約值200港元都唔夠）。佢話自己一向有投資股票，知咩叫穩陣，所以決定唔再炒比特幣，現改揸亞馬遜股票。

佢除咗炒股、出書之外，仲搞緊個算術Flashcards（抽認卡）嘅App，務求努力賺錢！

14歲前要賺夠億五

Andrew Courey目標係14歲前賺到2,000萬美元（約1.56億港元），因為同阿爸阿媽協議咗，若果賺得到就畀佢唔再返學讀書！

余絲韻