Market Insight：比亞迪不妨候低收集

呢期商會同企業春茗停不了，古勝同股友茶敍，講起呢兩年有唔少新股都係從事建築行業。在下翻查資料，原來一六年以來，新股之中真係有逾70隻係屬建築及相關行業的企業！

想釣大魚 要放長線

呢個現象說明咗啲乜？香港大興土木，建築行業蓬勃發展，好好賺？抑或從事建築業的企業比較容易搞靚盤數上市，上市唔一定為公司發展，志在之後金蟬脫「殼」？可是綜觀上市多年的大型建築股，股價同盈利表現又唔見得突出。

無論如何，建築行業都有其周期性，情況正如樓市一樣，且依家唔容易請人兼且勞工成本唔平，利錢又唔見得係特別好好，建築業相關新股中，幾多係值得投資的實力股，幾多只係純炒股票供求的賭博，股民必須要擦亮眼睛審慎選股。

講開新股，香港交易所（00388）話擬縮短新股上市改革諮詢。有券商估計，新經濟公司最快四月底可以遞交上市申請，相信嚟緊可以吸引更多創新企來港上市，尤其係大型的創科企業，港交所生意唔憂做。港交所將於周三公布末期業績，昨日股價做好，升3.5%報295.8元，似乎業績前後有機會再撲300元關。古勝一直睇好港交所，不過短線股價難免隨市況起起落落，坐得貨有心理要放長線，經得起風浪先有望釣到大魚。

中電控股（00002）公布去年度業績，核心盈利勝預期，並增派股息，昨日升1.8%收報78.9元。

高息股宜減不宜加

查實中電的派息回報都好穩定，而且海外項目亦做得出色，只係考慮到美國債息及美元走勢，今年對整體高息股還是要有一定保留，類似中電呢類優質收息股，唔係唔可以繼續揸，只係從整個投資組合的角度睇，高息股的比重宜減不宜加，這點要注意。

論板塊，汽車股昨日有好表現，長城汽車（02333）升4.6%、吉利汽車（00175）升6.4%，古勝愛股比亞迪（01211）升2.1%。股神巴菲特旗下巴郡有投資比亞迪唔係新聞，惟從最近巴菲特近日在致股東的信所披露，巴郡的前十五大持倉中，比亞迪的排名追過IBM，排第14位，亦係唯一一家中國公司。

當年股神投資中石油（00857）獲利豐厚，仍讓人記憶猶新。不過，比亞迪昨晚發盈警，指一七年度股東淨利潤下跌兩成，不妨等回吐才吸納。

古勝