絲絲講場：90後堅信200萬夠退休
香港係全球人均預計壽命最高地區之一，問題係夠唔夠錢過老。香港投資者教育中心去年中調查發現，逾半（52%）九十後諗住少過200萬元就夠退休！係離地定樂觀呢？
調查顯示，港人普遍認為理想退休年齡係58歲，估計退休儲備平均要632萬元。理想還理想，實際得唔夠兩成人預計能喺60歲退休，有53%人更睇死自己年過65歲後仲要打工。
三分一人完全冇規劃
驚還驚，但竟然有近三分一（34%）人坦言冇任何退休規劃。搞咩？原來每一代都出事。
九十後就冇乜定期儲蓄習慣，四成人缺乏理財目標，近四分一（24%）人份糧使超過八成，有35%仲要靠父母解決緊急財務狀況。
八十後雖則理財能力普遍較好，逾半（54%）有理財計劃同目標，但就負擔重，近半（47%）孭住債，有26%人有按揭貸款在身。
七十後或再年長啲嘅，理財經驗較豐富嘞，但亦唔包財務狀況好。有近29%人同啲九十後一樣咁大使，花費逾八成收入，仲有13%直頭冇應急錢！
黃天祐儲五年上到車
投資者教育中心主席黃天祐博士（Dr. Kelvin）自己又點？佢話畢業後第一份工喺永隆銀行做，月薪3,500蚊，其中三分二畀咗媽媽，所以後生時無咩財可以理。不過佢做咗五年嘢後，就用8萬蚊積蓄上車，喺廣播道買咗佢第一層樓。
Kelvin話，自己當年都要靠銀行九成半按揭，不過以前樓價無咁貴，話依家嘅社會環境就無咩可能嘞，佢好明白現時年輕人嘅苦況咁話。
佢今年57歲，計落儲五年錢就買到樓應該係八十年代嘅事，絲絲今時聽落似聽都市傳說。
余絲韻