李：外匯專家 李焜明（Joseph）（屬羊）
蔡：法興證券上市產品銷售部副總裁 蔡秀虹（Eva）（屬狗）
蘇：招銀國際策略師 蘇沛豐（屬狗）
黃：風水命相顧問 黃震宇
【宜】：輪證 Chok市睇實引伸波幅
親友：你屬咩生肖？
彩兒：話畀你知，咪畀你估到我幾多歲？我先冇咁笨。（假裝唔迷信，查實忐忑不安）
法興蔡秀虹表示，通常選擇大隻股份作長線持有。
外匯專家李焜明預料，美元匯價會穩定向上。
招銀蘇沛豐稱，小股災告一段落，北水應該會漸漸增多。
風水命相顧問黃震宇表示，今年港股整體會平穩向好。
彩兒：弊傢伙，犯太歲嘅股友今年係咪輸梗，係咪斬手指，唔投資就最理想？
黃：又冇話咁一刀切嘅，透過生肖只可以籠統分析大家嘅運程，出生日期及時辰八字都係決定性因素。
普遍嚟講，100個犯太歲嘅人士，七成會遇到阻滯；一成半仍可以升職、結婚同買樓；其餘一成半就平平穩穩度過一年啦！
Kitty：等我去求神先。
【忌】：揀貼價牛熊過夜恐危
Kitty：Eva，你今年好似犯太歲，驚唔驚？
蔡：我唔係好理自己有冇犯太歲，個人投資幾時都係穩健保守。因工作所限，唔會投資衍生產品，亦唔會炒即日鮮，通常揀啲大隻股長揸。
我有玩開ETF（交易所買賣基金），鍾意買追蹤恒生H股指數嘅恒生H股（02828），以及追蹤A股嘅安碩A50（02823），賺息賺資本增值。最近，我有啲心郁郁想買滙豐控股（00005）。
彩兒：你最熟悉衍生產品玩法，但自己冇得投資，有啲慘。不過，我都想你再提點我，買牛熊證同窩輪有咩要注意。
蔡：梗係冇問題啦。呢排個市比較Chok，你都會聽到不少牛熊證被強制收回，所以投資者買牛熊證時，要特別留意其收回水平。
以前揸較貼價嘅過夜，例如收市價與收回價差500點嘅都冇問題；依家就建議揀1,000點或以上會好啲。
至於投資窩輪，除了留意方向，仲要睇實引伸波幅。例如，喺早排大跌市，引伸波幅抽升，如果投資者當時先入市，引伸波幅下跌嘅時候，佢嘅窩輪就有影響。
另外，若大市暴升，Call輪被引伸波幅下跌拖累，可能會升少咗。相反，若大市冧，Call輪亦可能跌少咗，因為引伸波幅升，而抵銷番跌幅。
【宜】：外匯 料加息三次 美元看俏
Kitty：Joseph，喺新嘅一年，你有冇攞本通勝睇吓運程？
李：唉呀，我唔迷信。咩年都好，我會用番一貫嘅投資紀律。第一，定止蝕。第二，唔盲目跟市，會先做足功課。第三，會緊貼市況，靈活投資。第四，分散投資。第五，控制投資金額及風險。另外，炒匯一定要睇經濟數據、利率、央行取態及政治形勢。
Kitty：你覺得一八年全球經濟會點？
李：全球經濟會繼續復甦，但下半年有美國中期選舉及各國央行加息，增加不確定因素，股市波動必定大過上半年。
彩兒：咩貨幣值得投資？
李：我睇好美元，預計美國聯儲局今年會加息兩至三次，美元息口會幾吸引。就算有人驚人民幣取代美元，但我自己就覺得唔可能，因人行好驚資金外流，所以中國冇可能唔出手干預人民幣走勢，人民幣做唔到全面開放，又點會做到儲備貨幣？另外，美國係軍事強國，油價亦以美元做單位，一時三刻，美元地位係無可取替。
【忌】：談判欠籌碼 英鎊受累
彩兒：不過，各國央行似乎正緊隨美國加息，美元強勢會唔會被削弱？
李：唔排除！歐洲央行同英倫銀行都分別計劃喺九月同五月加息，只有日本央行維持不變。美國經濟唔錯，失業率偏低，依家係工搵人而唔係人搵工；美國白宮仲計劃喺未來10年內利用2,000億美元聯邦資金，撬動1.5萬億美元地方政府及社會投資，刺激經濟，預計美元匯價會穩定向上。
Kitty：你有冇睇淡邊隻貨幣？
李：英鎊囉！因英國脫歐談判冇籌碼，但距離啟動脫歐過渡期一九年三月所剩時間唔多，受不明朗因素影響，料今年英鎊僅徘徊1.35至1.40區間。投資者若要炒英鎊，都係玩波幅咋。歐元亦然，只能炒區間。因歐元太強會影響出口，所以我估計上半年歐元下望1.2，上望1.27至1.28。
【宜】：股市 滙控恒生內銀勢上
蘇：犯太歲又有咩好怕喎。
Kitty：命運在你手，永不低頭。（唱歌）
彩兒：你點睇後市？
蘇：嘻嘻！港股仲係牛市，早排小股災屬正常健康調整，港股估值唔貴，相信港股年中前會反覆向上，企業盈利亦持續向上。惟到下半年，企業盈利或放緩，且正值美國中期選舉，港股下行風險增大。
彩兒：有咩股份值得買？
蘇：目前嚟講，美國聯儲局繼續加息，國際銀行包括滙豐控股、恒生銀行（00011）及中國銀行（03988）等股份都會炒上。預料四大行及招商銀行（03968）都有更高增長動力，因為中國經濟逐步改善，去槓桿見成效，銀行壞帳風險減低。
【忌】：手機設備股料跑輸
蘇：至於睇淡板塊就包括手機設備股，因為佢哋一月出貨量明顯放緩，目前估值亦偏高，估計中線會跑輸大市。
彩兒：幾時要開始減磅？
蘇：小股災告一段落，北水應該會慢慢多番，恒指仲有得升。直到恒指年內觸及35,000點，內銀股市盈率到9倍，再減磅喇！大家亦唔可以偷懶，記住吼實經濟數據、企業盈利同貨幣政策，訓練前瞻性。
Kitty：講開啱啱嘅跌市，係由好消息觸發；如果再嚟大跌市，會唔會同樣捉唔到路？
蘇：我相信牛市真係見頂嘅時候，係會由壞消息觸發，就好似亞洲金融風暴咁。
【宜】：生肖投資法 搵基金公司代打理
黃：屬狗嘅朋友撞正本命年，亦即犯太歲，要事事小心。
Kitty：係呀，雖然你啱啱講，有三成犯太歲嘅人今年未必會行衰運，但我總係覺得會諸事不順，有啲擔心添！
黃：如果你屬狗，又係正月、二月或者五月出世，雖則犯太歲，但有貴人相助，今年財運會相對好啲，投資上有機會逢凶化吉。
不過，其實就算你唔喺呢三個月份出世，又唔使避開股票嘅，我預計，今年港股整體都會平穩向好，最多秋天七至八月，有少少調整。
然而，謹記要避免高風險投資，減少虧損，或考慮交畀基金公司幫自己投資。
【忌】：油股高科技股咪掂
彩兒：狗年旺啲咩、剋啲咩？
黃：你應該想知投資板塊呢！今年立春，火土炎燥，土即係鋼鐵、鋁材等建材原材料，以及樓宇等，所以今年建材業轉好，樓市亦會暢旺。然而，水火沖，石油股就有不穩定性。另外，高科技股份都唔睇好！
Kitty：如果去拜吓神，或者喺屋企排吓陣，可唔可以化解太歲？
黃：可以呀！可由情緒管理入手，先勿行驚蹈險，凡事忍讓，處事心平氣和先。跟住就可以擺個風水陣，催催財運。
例如喺東南位養缸魚、擺個風水輪、吉祥貔貅、招財佛或運財童子。不過，記住唔好喺生財、旺財位置擺植物或盆栽，否則財星被剋，未得財、先破財。
彩兒：除咗狗之外，屬龍、羊、牛、雞係咪都犯太歲？
黃：哈哈！其實邊有咁多生肖會喺同一年犯太歲吖！狗犯本命年，龍就正正對住狗，所以沖太歲。羊、牛就刑太歲。至於屬雞嘅朋友，俗語都話雞犬不寧，所以大家先話屬雞今年嘅運程麻麻。
Kitty：原來都冇咁弊，早啲講啦。
Kitty、彩兒
