絲絲講場：小加拖愛犬拜早年夠盞鬼
香港交易所（00388）行政總裁李小加每年都會向大家拜個早年，當然係希望新一年股市興旺啦！不過，今年就有啲特別，事關多咗「兩名特別嘉賓」，就係李小加連同兩隻愛犬粉墨登場，一隻係德國牧羊犬，另一隻就係鬥牛(梗)。
唔講唔知，原來李小加係愛狗之人，屋企養咗三隻狗，除咗上述兩隻大狗外，仲有一隻小狗。適逢狗年將至，小加當然帶埋其中兩隻大狗出嚟「亮相」應吓節啦！兩隻都係一歲大，非常活潑，其中隻鬥牛(梗)更非常搶鏡，不斷對住鏡頭吠，好似同大家講「恭喜發財」咁，好盞鬼！
「狗係生活嘅一部分」
小加話，狗係人類最好嘅朋友，佢哋性格熱情、忠心、誠實、服從，又有冒險精神，狗已經係佢生活嘅一部分。
講開狗有冒險精神，其實同小加性格都幾相似。小加曾經講過，好多嘢要大膽設想，敢想才能拚，更曾引用一齣電影嘅經典對白：「做人如果沒有夢想，跟條鹹魚又有甚麼分別？」咁又係，好似互聯互通、同股不同權等，全部都要排除萬難先可以實現！
講開拓展新業務，港交所主席周松崗就話，今年要引入創新型公司來港上市，同埋要推出更多金融產品。小加就話港交所唔止要帶住市場向前走，引入更多公司之餘，都要保障投資者。絲絲就話，乜都假，最緊要個市延續雞年旺勢，乜股都雞犬皆升就最好！
余絲韻