過去30年美國出現過4次大跌市，雖然4次跌市各有原因，但出奇地這四次都係由共和政黨總統執政。以後市場風險系數應否加入共和黨？
今次股災，好多人措手不及，而VIX的抽升，更令XIV（逆向炒波幅指數）基金重創。上世紀八十年代日本樓市，○八年次按危機，以及今次VIX大跌，反映人類不斷重複犯錯。 當某一項投資工具長期處於只升不跌的環境時，人就好容易以為這是定律，忽略咗風險。
目前係咪熊市意義不大，只係五個交易日就跌10%，就算牛市未死都元氣大傷。但筆者仍覺得這次只係受經濟周期性影響的調整市，並非出現系統性風險。經濟周期風險可視作8號風球，系統性風險就係10號颶風信號，前者受加息通脹影響，公司估值相應下調，但公司結構、地區的經濟活力並沒有重大受損。
系統性風險破壞力就好唔同，主要來自公司高槓桿出現的危機，係會產生通縮，破壞經濟動力，如九七年亞洲金融風暴及○八年的次按危機。
標普500指數近十年出現過30多次急跌超過10%，但演變為熊市只出現過6次，而我相信今次不會係第七次。港股由16倍PE開始回吐，29,000點大概是14.5倍PE，再跌10%係13倍PE，即係大概26,000點。如果係中港美地區無系統性風險，13倍PE都唔敢入市，咁大家不如放棄投資股票。
不過，短期內有咁大跌幅，亦要時間復原，一般最少要四個月，另外再要用四個月回復動力，再創新高，即使今次只係經濟周期性的調整，恒指要再創新高，或是第四季的事。依家策略，若未能及早離場的，就毋須現價位才止蝕，等於你第二層作投資的物業跌10%時，相信無人會止蝕賣出，咁點解股票就咁輕易止蝕？對於投資股票而言，好的股票不止蝕較早食胡更重要。
由任職國際大行到創業揸莊，經歷無數金融巨浪，以識見捕捉趨勢，博高Fund，也要有Fun。
作者：微子