Market Insight：業績期至 瞄準重磅股

手機股繼續發力，舜宇光學（02382）升逾半成、瑞聲科技（02018）升3.4%、丘鈦科技（01478）升近一成。印象中，手機股喺大跌市前已率先調整，近兩日做好是否意味今次股市跌浪已屆尾聲？古勝就認為，一來手機股已率先調整，二來與利率因素關係非太大，芬佬要搵個股暫時停泊，揀手機股勝在具流通量又股價已率先作調整，但係咪等於認同行業景氣進一步轉好而買番貨，就見仁見智。

港交所不妨分注買

騰訊控股（00700）昨日反彈3%重上420元樓上，400蚊邊撈貨機會一瞬即逝。不過，一個事實係，當騰訊股價升到上四字頭，股價再難大幅炒上，取而代之係炒波幅。明白呢個道理，也許短炒正股或沾手相關輪證，亦需要調整一吓策略，就係要等技術指標超賣時才出手，兼且唔好大貪，博反彈有胡要食。

市況反彈，香港交易所（00388）乘機收復260元失地，收報266元，升3.1%。長假後又到重磅股輪流公布業績的時候，港交所將於二月二十八日公布業績，應該唔會差，但就未及反映到一月市旺因素。由於下半年多家內地獨角獸擬來港上市，照計港交所呢啲位唔使睇得太淡，但短期市況尚處波動期，港交所股價難免反覆，但就係呢啲市，中長線先至會買到靚價，有信心持長倉，不妨考慮分注布局。

炒消費股記得食胡

講到業績股，其實古勝覺得滙豐控股（00005）都值得押注，一來預計業績唔會差，二來見上周港股大跌市，但啲北水仲係咁大手吸納。早前在下都講過，近兩年在北水力吸之下，其實大笨象的街貨都相對歸邊，只要市況就，遲早要來一次大爆發。現價往績息率近5厘，中線值得一試。

此外，臨近歲晚消費旺季，唔少同胞都經已收爐回鄉過年，消費股靜市反而有機會突圍，好似昨日蒙牛乳業（02319）升3.3%，康師傅（00322）升3.9%，周黑鴨（01458）升3.4%。不過，呢類股升勢一般都係短癮，短炒坐啱順風車，長假前仲係先食胡為妙。

古勝