絲絲講場：財金圈過節 講心又講金

恒生銀行（00011）經濟研究部主管兼首席經濟師薛俊昇話，今年都係同太太食意大利大餐，仲特登揀中午，事關夜晚要湊仔女！

至於情人節預備咗咩？薛俊昇話「都係送花、餐廳有訂枱又扮冇訂」，仲話「港男好慘，只有份送禮物o架咋！」薛太睇到會唔會嬲？薛俊昇九秒九答：「我都係講吓笑啫！」

許長泰同太太去打邊爐

摩根資產管理常務董事兼亞洲首席市場策略師許長泰（Tai）話會同太太去打邊爐，仲話作為精明消費者，佢係唔會喺呢啲日子去食二人套餐嘅，因為「餐值」偏貴！

計絲絲話，兩公婆一齊去打邊爐仲暖入心啦！

韓家輝拖大小情人食飯

恒基物業代理營業（二）部總經理韓家輝（Mark哥）話，對孖女出世後，每年情人節都大小情人「四人行」。日前適逢對囡囡兩歲生日，特別去咗主題公園酒店食飯慶祝，兩個小天使仲戴住媽咪製作嘅愛心頭飾。

咪以為Mark哥有女萬事足就唔記得太太呢位大情人，佢尋晚提早同太太去食飯慶祝，過二人世界，係一百分嘅爸爸同丈夫。

麥穎儀約姊妹歎意式菜

法巴環球市場部上市衍生產品部麥穎儀話，今個情人節冇情人，但佢照慶祝，約好一班女仔Friend去食意大利菜。Jenny回憶番佢過去最難忘嘅情人節，係讀書時代同男朋友出去慶祝，點知撞到媽咪，仲即刻被拖返屋企鬧咗一餐！佢依家諗番都覺得好好笑！

余絲韻